Վարչապե'տ, դուրս արի' քո տաք կաբինետից, եթե դուրս չես գալիս, ուրեմն հեռացի'ր

Շրջանառության հարկի մասին նոր օրենքի կասեցում պահանջող հարյուրավոր առեւտրականներ կրկին հավաքվել ենԿ կառավարության շենքի դիմաց:

«Վարչապետ, դուրս արի քո տաք կաբինետից: Եթե դուրս չես գալիս, ուրեմն հեռացիր»,- ասում են նրանք` վանկարկելով «վարչապետ», «Հովիկ, իջիր», «կասեցում»:

Ցուցարարները որոշել են նստացույց անել կառավարության դիմաց:

Հիշեցնենք, որ 2014թ. հոկտեմբերի 1-ից ուժի մեջ է մտել «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։ Տոնավաճառների աշխատողների բողոքներից հետո միայն հոկտեմբերի 6-ին վարչապետ Հովիկ Աբրահամյանը հանձնարարել է մինչեւ 2015թ. փետրվարի 1-ը հետաձգել «Շրջանառության հարկի» մասին օրենքում առկա գույքագրման պահանջը:    

Աղբյուր` Slaq.am