Վարչապետների աշխատանքը գնահատում են երկու տարի հետո

Այսօր «Ֆորում» մամուլի ակումբում հրավիրված ասուլիսի ժամանակ, բանախոսներ ԱԺ ՀՀԿ խմբակցության պատգամավոր Մկրտիչ Մինասյանը եւ <Սոցիոմետր> անկախ սոցիոլոգիական կենտրոնի տնօրեն Ահարոն Ադիբեկյանը, խոսեցին ներքաղաքական հնարավոր զարգացումների, ՀՀ վարչապետի ծավալած գործունեության եւ ոչ իշխանական քառյակի վերաբերյալ:

Վարչապետի աշխատանքային հարյուր օրվա լրանալու հետ կապված, պատգամավոր Մկրտիչ Մինասյանը նկատեց. <Բազմիցս առիթ եմ ունեցել այդ թեմայով խոսելու, եւ հիմա նորից կշեշտեմ, որ Հովիկ Աբրահամյանն այն մարդն է, ով իրատես է, եւ բիզնես աշխարհի նրբություններին ծանոթ: Հույս ունեմ, որ այն ծրագրերը, որն ինքն իր առջեւ դրել է՝ կախարդական փայտիկ չունենալու պարագայում, ամենայն հավանականությամբ իր կազմակերպչական շնորհքով եւ իրատեսությամբ կապացուցի, որ կկարողանա հնարավորինս  արդյունավետ իրագործել:

Իսկ ինչ վերաբերում է օլիգարխիային հարկային դաշտ բերելու հիմնախնդրին՝ այդ գործընթացը սկսված է, եւ կարծում եմ, որ այլ ճանապարհ չկա: Ես երկար տարիներ աշխատել եմ տեղական ինքնակառավարման մարմիններում եւ Հովիկ Աբրահամյանին ճանաչում եմ դեռ այն ժամանակվանից, երբ ես կորդինացնում էի համակարգը: Այդ ժամանակ մենք տեսանք մի մարդու, ով իրոք ձեռքերը <քշտած> զբաղվում էր մեր գործերով եւ դա փաստ է: Ուզում եմ ասել, որ Հովիկ Աբրահամյանը կազմակերպչական ձիրք եւ շնորհք ունեցող մարդ է, եւ իր գիտելիքները, փորձը, հմտությունները կիրառվելու են հստակ ծրագրեր իրականացնելու համար:

Տվյալ թեմայի շուրջ Ահարոն Ադիբեկյանն էլ հայտնեց հետեւյալ տեսակետը. <Եթե նայենք, թե ով է եղել վարչապետ` կհասկանանք, որ Հովիկ Աբրահամյանը պրակտիկայից է եկել: Օրինակ՝ Տիգրան Սարգսյանը պետք էր ֆինանսական հարցերը կարգավորելու,վարկեր բերելու համար, իսկ Ռոբերտ Քոչարյանը փորձեց պետությունն այնպիսին ներկայացնել, որ մեզ վստահեն: Նրանցից ամեն մեկը մի լումա է ներդրել պետության զարգացման համար, իսկ Լեւոն Տեր-Պետրոսյանը՝ լավ քանդող է եղել: Հիմա մեզ հարկավոր է տնտեսվար մի անձնավորություն, ով հասկանում է բիզնեսից եւ նրբություններն էլ լավ գիտի: Հարկ է նկատել, որ ոչ մի վարչապետ ինքնուրույն չի աշխատում. բոլորն էլ թիմ ունեն՝ խորհրդատուների, փորձագետների եւ ամեն մեկն իր փորձի հիման վրա կարող է առաջարկներ անել, եւ նա էլ լսելու ունակություն ունի, խորհուրդները միանգամից ընկալում է, եւ ընտրում է ամենաճիշտը: Պետք է նկատեմ, որ դա շատ մեծ ունակություն է, երբ առաջին դեմքը կարողանում է իր թիմի անդամների կարծիքները համատեղել ու լուծման բարոյական պատասխանը վերցնել իր վրա>:

Սոցիոլոգը նաեւ հավելեց. <Վարչապետների աշխատանքը սովորաբար գնահատում են երկու տարի հետո, նախագահինն ավելի շուտ, որովհետեւ գործի փոփոխությունը միանգամից է նկատվում, իսկ վարչապետի գործունեությունն ամբողջությամբ տեսնելու համար հարկավոր է ժամանակ, որ տեսնենք թե որոշ ծրագրեր, որոնք կյանքի էին կոչվել ,ինչպես ստացվեցին>:
Դե իսկ քաղաքական քառյակի գործելաոճի եւ հնարավոր կամ անհնարին հետագա զարգացումների վերաբերյալ էլ, Մ. Մինասյանը նշեց. <Քառյակի մեջ ընդգրկված տարբեր կուսակցություններ  տարբեր գաղափարախոսություններ ունեցող կուսակցություններ են, պարզապես կան հարցեր, որոնց շուրջ նրանք համատեղել են սեփական ուժերը: Կլինեն նաեւ այնպիսի սկզբունքային հարցեր, որտեղ նրանք տարակարծություններ կունենան եւ դա նույնպես նորմալ է: Նրանք դեռ որոշ հարցերի շուրջ փորձելու են համատեղ գործել, սակայն այնպիսի կարեւորագույն հարցերի շուրջ, ինչպիսիք են՝ սահմանադրական բարեփոխումները, տեսնում ենք, որ տարաձայնություններ կան…>:

Սոսե  Չանդոյան