Վարդան Պետրոսյանի գործով այսօր հնարավոր է դատավճիռ կայացվի. փաստաբան

Դերասան Վարդան Պետրոսյանի եւ տուժող Հակոբյանների միջեւ քաղաքացիական հայցի շուրջ համաձայնության գալու դեպքում այսօր հնարավոր է դատավճիռ կայացվի։ Այս մասին NEWS.am-ի հետ զրույցում այսօր՝ հունվարի 16-ին, ասաց տուժող կողմի փաստաբան Ռուբեն Բալոյանը։

«Մենք քաղաքացիական հայց ենք ներկայացրել, որ Տաթեւիկ Հակոբյանի բուժման համար Վարդան Պետրոսյանը վճարի 10.5 միլիոն դրամ, իսկ դատական ծախսերի համար 2.5 միլիոն դրամ, բայց հիմա պատրաստ ենք նվազեցնել մեր նշած գումարը, որպեսզի կողմերը համաձայնության գան»,-ասաց փաստաբանը։

Ռուբեն Բալոյանը նաեւ նշեց, որ կողմերի միջեւ համաձայնության գալու դեպքում ինքը պատրաստ է հրաժարվել իր այն միջնորդությունից, որ Առողջապահության նախարարության կողմից ստեղծվի հանձնաժողով Տաթեւիկ Հակոբյանի բուժման հետ կապված հարցերի մասին եզրակացություն տալու համար։

Նշենք, որ դատարանը Վարդան Պետրոսյանին դեռ չի ճանաչել քաղաքացիական հայցվոր։ Ավելի վաղ տուժող կողմը Վարդան Պետրոսյանին քաղաքացիական հայց էր ներկայացրել, ըստ որի դերասանից պահանջում էին 10.5 միլիոն դրամ վճարել Տաթեւիկ Հակոբյանի բուժման ծախսերն ապահովվելու համար, իսկ 2.5 մլն դրամ դատական ծախսերի համար։

Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ Էդվարդ եւ Էդգար Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։