Վարդան Ղուկասյանը Սահմանադրության և միասեռականների մասին

Գյումրիի նախկին քաղաքապետ Վարդան Ղուկասյանը չի ծանոթացել Սահմանադրական բարեփոխումների նախագծին, ցանկություն չունի ծանոթանալ, բայց երկու կետ առաջացրել է նրա զայրույթը: Նախ, որ այս նոր նախագծով առաջարկվում է վերացնել մեծամասնական ընտրակարգը և հաստատել 100 տոկոս համամասնական ընտրակարգ, և հետո, Ղուկասյանին «հունից հանել է» միասեռ ամուսնությունների մասին դրույթը:

«Ես դեմ եմ, որ մեծամասնական չլինի, ոնց կարող է տենց բան լինել ու մեր երկրում մեծամասնականով պատգամավորներ չլինեն: Ինչ վատ է, որ մեկը կարող է կուսակցական չլինել, բայց իր ժողովրդի վստահությունը ստանալ, կուսակցությանը հաղթել ու պատգամավոր դառնալ: Էդ մարդու ճանապարհն ինչո՞ւ փակենք: Այս դրույթը մարդու իրավունքների ոտնահարում է»,-«Առաջին լրատվական»-ի հետ զրույցում ասաց Ղուկասյանը:

Մեր դիտարկմանը, որ նախկինում էլ մեծամասնական ընտրակարգով ընտրվողները կուսակցական էին, Ղուկասյանը նկատեց. «Պարտադիր չէ, ամեն դեպքում սա սահմանափակում է, մարդու իրավունքների խախտում: Ինչու ստիպենք ամբողջ ազգին, բոլորին կուսակցականանալ, որ պատգամավոր դառնան, որ ի՞նչ: Մեծամասնականով ընտրվողները հզոր մարդիկ են, ովքեր չէին ուզում կուսակցական դառնալ, ու հիմա մենք ստիպում ենք նրանց դառնալ կուսակցական»,-հավելեց Ղուկասյանը:

Ինչ վերաբերում է միասեռ ամուսնությունների վերաբերյալ Վենետիկի հանձնաժողովի դիտարկումներին, Ղուկասյանը նկատեց, որ պետք չէ Վենետիկի հանձնաժողովի ասածները որպես դոգմա ընդունել: «Մնացած հարցերը ես շատ չեմ ուսումնասիրել, բայց սրա մասին կարող եմ ասել, որ միասեռ ամուսնությունները աշխարհի ամենամեծ անբարոյականությունն են, և աշխարհի կործանումը դրա մեջ է: Եթե ամբողջ աշխարհը ընդունի միասեռականությունը, ուրեմն իմացեք, որ Տիրոջ գալուստը մոտ է, և այս աշխարհի կործանումը մոտ է, քանի որ Սոդոմն ու Գոմորը Աստված հենց դրա պատճառով ավերեց: Միասեռ ամուսնությունները աշխարհի ամենավերջին անբարոյականության ամենավերջին կետն են»,-ասաց Ղուկասյանը՝ հավելելով, որ մեր իշխանությունները չպետք է տուրք տան Վենետիկի հանձնաժողովի դիտարկումներին, գնահատականներին և երբեք չպետք է դա թույլ տան օրինականացնել: «Դա ամոթ է, խայտառակություն է: Ով նման բաներին տուրք կտա, ուրեմն ինքն էլ է այդպիսին, այլապես մարդը չի կարող այլանդակության հետևից գնալ»:

Ղուկասյանը զարմանում է, թե ինչու է Հայոց եկեղեցին լռում, չի ընդդիմանում այս «նորամուծությանը»: «Եկեղեցին պետք է պայքարի դրա դեմ»,-ասաց Գյումրիի նախկին քաղաքապետը:

Այլ հարցերի Ղուկասյանը հրաժարվեց պատասխանել՝ պատճառաբանությամբ, որ չի ծանոթացել և ցանկություն չունի անտեղյակ բաներից խոսել: