Վայքի քաղաքապետի պաշտոնին առայժմ հավակնում է երկու թեկնածու

Այսօր ժամը 18-ին լրանում է հունվարի 18-ին Վայոց ձորի մարզի Վայք քաղաքային համայնքի ղեկավարի արտահերթ ընտրությանը թեկնածուների առաջադրման վերջնաժամկետը:

Ըստ Կենտրոնական ընտրական հանձնաժողովի կայքէջի՝ այս պահի դրությամբ առաջադրման համար անհրաժեշտ փաստաթղթեր թիվ 39 ընտրատարածքային ընտրական հանձնաժողով ներկայացրել է երկու թեկնածու՝ ՀՀԿ-ի կողմից առաջադրված նույն կուսակցության անդամ, ՋՕԸ գործադիր տնօրեն Արագած Սաղաթելյանը և ինքնաառաջադրված անկուսակցական, «ՀԷՑ» ՓԲԸ «Արաքս» մասնաճյուղի Վայքի ՀԷԿ-ի վարպետ Ալեքսան Սիմոնյանը:

Ինչպես «Փաստինֆո»-ն ավելի վաղ հայտնել է, Վայքի քաղաքապետի արտահերթ ընտրության անցկացումը պայմանավորված է նախկին քաղաքապետ Հարություն Սարգսյանի լիազորությունների վաղաժամկետ դադարեցմամբ: Նա այս տարվա նոյեմբերի 6-ին իր լիազորությունները դադարեցնելու վերաբերյալ դիմում է ներկայացրել:

ՀՀ կառավարության նույն օրվա որոշմամբ Հարություն Սարգսյանը նշանակվել Վայոց ձորի մարզպետ՝ այդ պաշտոնում փոխարինելով Լեհաստանում Հայաստանի արտակարգ և լիազոր դեսպան նշանակված նախկին մարզպետ Էդգար Ղազարյանին: