«Վերծանումները իրականությանը չեն համապատասխանում»

Շիրակի մարզի ընդհանուր իրավասության դատարանում շարունակվում է Վարդան Ղուկասյանի դստեր փեսացու` Կարեն Եսայանի սպանության գործով աղմկահարույց դատավարությունը: Վերջին դատական նիստի ընթացքում կողմերի միջեւ վիճաբանության մի նոր առիթ դարձավ Կարեն Եսայանի հեռախոսը: Դեռեւս անցած դատական նիստին ամբաստանյալ Հարություն Սարգսյանի փաստաբան Լուսինե Սահակյանը միջնորդություն էր ներկայացրել դատարանին`սպանված երիտասարդի հեռախոսը դատարան ներկայացնելու, քանի որ այն կարող է արժեքավոր իրեղեն ապացույց դառնալ:

ՙՏուժողի իրավահաջորդի շահերը ներկայացնող Արմեն Մելքոնյանը հեռախոսը իր հետ բերել էր դատարան: Մոտ 15 րոպե զննելուց հետո, հասկացա, որ հեռախոսի պարագայում, ինչպես եւ մյուս իրեղեն ապացույցների դեպքում, եւս միջամտություն է տեղի ունեցել. այնտեղ ֆիքսված է ընդամենը մեկ մուտքային զանգ եւ երկու ելքային զանգեր, մինչդեռ նման հեռախոս գոյություն չունի, որը պահպանի մեկ կամ երկու զանգեր: Այսինքն` ակնհայտ է, որ ջնջվել են նախորդ հեռախոսազանգերը՚, - forums.am-ի  հետ զրույցում ասաց ամբաստանյալ Հարություն Սարգսյանի փաստաբան Լուսինե Սահակյանը:

-Այստեղ ուշագրավն այն է, որ  մուտքային զանգը զոհի հեռախոսին հնչել է սպանության գործը քննող քննիչ` Խաչիկ Հայրապետյանի հեռախոսից, այնտեղ ֆիքսված է նրա հեռախոսահամարը: Իմ պրակտիկայում նման դեպք չի արձանագրվել, որ քննիչը զանգահարի զոհին: Ընդ որում 8.15 դիակն է հայտնաբերվել, իսկ այս քննիչը ժամը 8.20-ին Երեւանում գտնվելով` իբրեւ թե հարցաքննություններ էր անցկացրել Գյումրիում:

-Ըստ Ձեզ ինչո՞վ է դա պայմանավորված:

-Չեմ կարող ասել ինչով է դա պայմանավորված, բայց մի բան այստեղ հաստատ այն չէ: Բանն այն է, որ կան սպանվածի հեռախոսազանգի վերծանումները, սակայն ո՛չ մուտքային, ո՛չ ելքային զանգերում այդ զանգը չկա, բայց հեռախոսի մեջ կա: Այսինքն այդ վերծանումները իրականությանը չհամապատասխանող վերծանումներ են, որն արդեն իսկ տարօրինակ է: Անկախ այն բանից քննիչը երբ է զանգել, դա պրոբլեմ է:

Ն. Ադամյան