Վիրաբույժը պնդում է, թե «հիվանդն անտեր չի մնացել»

Փաստինֆոն գրում է. 2011թ. բանակում զինծառայող Հայկ Խաչատրյանի՝ ջրծաղիկից մահանալու գործով այսօրվա դատական նիստում կրկնակի հանձնաժողովային դատաբժշկական փորձաքննությանը մասնակցած վիրաբույժ, դոկտոր պրոֆեսոր Միսակ Միրիջանյանը հայտարարեց, որ բժիշկ-ամբաստանյալներն արել են ամեն հնարավորը եւ «եթե դրանից ավել էլ անեին, ապա միևնույն է զինծառայողը մահանալու էր»:

Փորձագետ Միրիջանյանը պնդեց իրենց կողմից տրված կրկնակի հանձնաժողովային դատաբժշկական փորձաքննության եզրակացությունը՝ նշելով, որ նախ և առաջ պետք է ժխտվեր վիրաբուժական պաթոլոգիան՝ սուր որովայնի պատկերը, քանի որ այն չժխտվելու դեպքում մահը 100 տոկոս էր:

Նշենք, որ զինծառայողի մոտ եղել են որովայնի սուր ցավեր, իսկ դրանից առաջ ախտորոշվել է ջրծաղիկի ծաղկող շրջան և որպեսզի ժխտվի սուր որովայնի պատկերը, վիրաբույժը նրան պահել է դինամիկ հսկողության տակ, իսկ հոսպիտալը եղել է բազմապրոֆիլ։

Միայն մեկ օր անց Հայկ Խաչատրյանը տեղափոխվել է «Նորքի ինֆեկցիոն հիվանդանոցը», որը մոնոպրոֆիլ է:

Արդյոք մեկ օր ուշացումով տեղափոխելը չի՞ բերել նման բացասական ելքի հարցին ի պատասխան՝ փորձագետը կարծիք հայտնեց, որ անգամ մեկ օր առաջ տեղափոխվեր, ապա այդ դեպքում էլ հնարավոր չէր ոչինչ անել։ Նրա խոսքերով՝ մեկ օրը դա ուշացում չէ՝ ջրծաղիկի ծաղկած շրջանի համար, իսկ սուր որովայնի դեպքում, մի քանի ժամը նշանակություն ունի. «Ի վերջո, հիվանդը անտեր չի մնացել»:

Փորձագետը հիվանդին ինֆեկցիոն հիվանդանոց չտեղափոխելը բժշկական տեսանկյունից հիմնավորված է համարում, իսկ տվյալ դեպքում վիրաբույժի գոծողությունները գնահատում է ճիշտ:

Նշենք նաև, որ այօրվա դատական նիստին տուժող կողմը ևս չէր ներկայացել:

Նիստը նախագահող դատավոր Վլադիմիր Գրիգորյանը հայտարարեց, որ հակված է դատաքննությունն ավարտելուն, բայց քանի որ տուժող կողմը չի ներկայացել նիստին, հետեւապես դատաքննությունը լրացնելու միջնորդությունների վերաբերյալ նրանք կարծիք չեն կարող հայտնել:

Ելնելով նրանց դատավարական իրավունքներից և հավասարության սկզբունքից՝ դատական նիստը հետաձգվեց:

Հաջորդ դատական նիստը տեղի կունենա նոյեմբերի 21-ին: