Վկան ոչինչ չէր պատկերացնում

Փաստինֆոն գրում է. Ոստիկանության համակարգում ֆինանսական բուրգի գործով այսօրվա նիստում հարցաքննվեց երկու վկա:

Հակոբ Ղուկասյանը, գործի տվյալներով, լիազորագիր է գրել և հանդես եկել որպես երաշխավոր, որպեսզի գործով միակ ամբաստանյալ Արթուր Անդրեասյանը կարողանա գրավադրել վկայի անունով գրանցված, սակայն փաստացի գործով տուժող Արտակ Գալստյանին պատկանող երեք տարածքները:

Վկան, մեղմ ասած, ոչ հոդաբաշխ էր խոսում, անհնարին էր հասկանալ, թե Արթուր Անդրեասյանի հետ ու՞ր են գնացել և ինչո՞ւ, ի՞նչ նպատակով պետք է բանկում գրավադրվեր անշարժ գույքը:

Վկան մեծ դժվարությամբ միայն մտաբերեց, որ ամեն ամիս վճարումներ է կատարում «Յունիբանկում», գումարները փոխանցում է Արտակ Գալստյանը:

Միայն նախաքննական ցուցմունքներից, որոնք նա, ի դեպ, պնդեց, պարզ դարձավ, որ Արտակ Գալստյանն իրեն ասել է, որ կգա Արթուր Անդրեասյանը, ինչ կասի՝ կանես, խոսքը վարկ ստանալու նպատակով հիշյալ տարածքները բանկում գրավադրելու մասին է: Անհրաժեշտ ձևակերպումներն անելու համար վկան ամբաստանյալի հետ գնացել է բանկ, նոտարական գրասենյակ, կադաստր:

Այսօր դատարանում հարցաքննվեց նաև վկա Հովհաննես Առաքելյանը, ով մինչև 2012թ. փետրվարի 22-ը աշխատել է որպես «Բիզնես Լիդեր հոլդինգ» ընկերության տնօրեն: Այդ ընկերությանն են պատկանում «Մոսկվիչկա» խանութների ցանցը, որոնց սեփականատերը Երևանի նախկին ոստիկանապետ Ներսիկ Նազարյանի որդին՝ Արմեն Նազարյանն է:

Դատարանի այն հարցին, թե ի՞նչ կարող է վկան ասել ամբաստանյալի մասին՝ վկան հայտարարեց, որ ոչինչ չի կարող ասել: Ըստ վկայի՝ ինքը չի լսել, որ Արթուր Անդրեասյանը աշխատեցնում է «Մոսկվիչկա» խանութների ցանցում գործող փոխանակման կետերը:

Այսօր դատարան չէին ներկայացել մի շարք վկաներ, այդ թվում՝ հիշյալ Արտակ Գալստյանի կինը՝ Վեներա Գալստյանը, ով, ըստ ամուսնու, վատառողջ է և արտասահման է տեղափոխվել՝ բուժման:

Քանի որ դատարանը չի ստացել այդ հայտարարությունը հաստատող որևէ փաստաթուղթ, ուստի դատարանը որոշեց վկային բերման ենթարկել: Բերման կենթարկվի ևս մեկ վկա: