«Խիստ ընդդիմադիր» ԲՀԿ-ն Չարենցավանում կպաշտպանի ՀՀԿ-ական քաղաքապետին

1in.am-ը գրում է.Դեկտեմբերի 14-ին մի շարք մարզերի քսանից ավելի համայնքներում տեղական ինքնակառավարման մարմինների ընտրություններ են:

Առաջադրված թեկնածուների հիմնական մասը իշխող Հանրապետական կուսակցության ներկայացուցիչներ՝ գործող համայնքապետերն են: Նրանք ընտրությանը մասնակցում են՝ հիմնականում մրցակցելով իրենց կուսակիցների հետ, որոնք ակնհայտորեն ձևական թեկնածուներ են, իսկ որոշ դեպքերում մրցակցում են անկուսակցական թեկնածուների հետ:

Ընդդիմադիր կամ իրեն ընդդիմություն հռչակած որևէ կուսակցություն որևէ համայնքում թեկնածու չի առաջադրել: Ավելին, որոշ տեղեկություններով՝ իրեն ընդդիմադիր համարող ԲՀԿ-ն պատրաստվում է համայնքներից մեկում պաշտպանել ՀՀԿ-ական թեկնածուին: ԲՀԿ-ն ՀՀԿ-ական թեկնածուին կպաշտպանի Կոտայքի մարզի Չարենցավան քաղաքում, որտեղ առաջադրվել է ՀՀԿ-ական, գործող քաղաքապետ Հակոբ Շահգալդյանը, որը վարչապետ Հովիկ Աբրահամյանի խորհրդական, Կոտայքի մարզի նախկին մարզպետ Կովալենկո Շահգալդյանի որդին է: Կրտսեր Շահգալդյանը ընտրապայքարում միայնակ է: Անկուսակցական Արտավազդ Ալեքսանյանը արդեն իսկ ինքնաբացարկ է հայտարարել:

Հայտնի է, որ ԲՀԿ-ն մեծ ազդեցություն ունի Կոտայքի մարզում, սակայն որոշել է չխանգարել ՀՀԿ-ական թեկնածուի ընտրությանը, քանի որ հակառակ դեպքում կարող է արժանանալ Հովիկ Աբրահամյանի զայրույթին, որն արդեն իսկ տվել է իր «դաբրոն», որպեսզի հավատարիմ խորհրդականի որդին կրկին քաղաքապետ դառնա: Եվ միայն հանուն Հովիկ Աբրահամյանի ԲՀԿ-ն որոշել է չխանգարել կրտսեր Շահգալդյանի ընտարշավին: ԲՀԿ-ի մարզային և համայնքային կառույցներին արդեն իսկ զգուշացվել է կայացված որոշման մասին: Ու եթե ԲՀԿ-ն հակառակը կպնդի, ապա դա ապացուցելու համար գոնե «սեփական» մարզում թեկնածու կառաջադրեր, թեկուզ ձևական՝ վստահ լինելով, որ չեն անցնելու: Իսկ հետևողական լինելու դեպքում գուցե և ընտրվեր հենց իրենց թեկնածուն: Բայց դե որտեղ ՀՀԿ-ի հետ Հովիկ Աբրահամյանի մակարդակով շահերի բախում կա՝ այնտեղ ԲՀԿ-ն միշտ զիջող է:

մանրամասները՝ սկզբնաղբյուրում