Յունիբանկ… 18 տոկոսով ավա՞նդ, թե՞ խաբված ավանդատուներ.analitik.am VIDEO

Վերջին տարիներին իր  ֆինանսական գործունեության պատճառով analitik.am-ի  ուշադրության կենտրոնում է հայտնվել մի աննախադեպ անձնավորություն, և լրագրողական հետաքննության բուն նպատակը պարզելն է, թե ո՞վ է իրականում այդ մարդը՝ ֆինանսական հանճա՞ր, թե, մեղմ ասած,   «աճպարար»:

Ուշադրության կենտրոնում նա հայտնվեց, քանի որ  նրա սեփականություն հանդիսացող  «Յունիբանկը»  ֆինանսական ճգնաժամի ժամանակ սկսեց աննախադեպ տոկոսադրույքով ավանդներ  վերցնելու առաջարկով ագրեսիվ գովազդային արշավ  իրականացնել,սակայն վարկ չտալ, ավելին՝ տրված վարկերի վերադարձելիությունն էլ գրեթե զրոյական  է:

Եվ այսպես՝  ներկայացնում ենք  Գագիկ Զաքարյանին.

Ռուսաստանաբնակ հայազգի գործարար, «Յունիբանկ» , «Յունիաստրոմ»  բանկերի և մի շարք այլ ֆինանսական կազմակերպությունների բաժնետեր, սեփականատեր:

Մեր հանճարն  իր գործընկեր Գրիգորի Պեսկովի հետ սկսել է  իր գործունեությունը դեռևս կոոպերատիվների ժամանակ:

Զբաղվել են հաշվիչ տեխնոլոգիաներով և այլ ոլորտներով : Երկուսն էլ Մոսկվայի ավիացիոն ինստիտուտի սաներն են՝  այսինքն թռչելու և իրենց համար անվտանգ  վայրէջք կատարելու արվեստին ծանոթ են վաղուց,  և այս արվեստը դեռ շատ պետք կգա նրանց:

Նրանք  երկուսով հիմնադրեցին «Յունիաստրոմ »  բանկը , այնուհետև սարդոստայնը տարածվեց:

Ինչևէ, որպեսզի փորձենք հասկանալ Գագիկ Զաքարյանի  ֆինանսական համակարգում ավիացիոն նորամուծությունների հաջողության գաղտնիքը, պետք է անրադառնանք նրա կողմից իրականացված բազմաթիվ անվտանգ «թռիչքներից»  մեկին:

Եվ այսպես՝  վերջինս   «Յունիաստրոմ»  բանկի միջոցով ստեղծում է «ОФБУ»` բանկային կառավարման ընդհանուր  ֆոնդերը: Այդ ֆոնդերի հիմնական նպատակը  հետևյալն է. Մարդիկ հավաքվելով, այսպես ասած, ֆոնդի մեջ կազմում են  «ընտանիք»   և կատարում կոլեկտիվ ներդրումներ , իսկ ստացված շահույթը տրվում է ֆոնդի մասնակիցներին՝ համամասնորեն:

Ֆոնդը, որ կառավարում է այս ներդրումները բուն իմաստով նույն  «Յունիաստրոմ»  բանկն է : Նույնիսկ իրենց գովազդային հոլովակում և կայքում  նշում են.  « Ֆոնդը ստեղծված է ոչ թե շահույթ ստանալու, այլ տեխնիկական խնդիրներ լուծելու համար»:  Ֆոնդի անունն էլ դնում են ոչ ավել ոչ պակաս,«Պրեմիեր»:

Եվ այս միջոցով,  ակտիվ գովազդով Գագիկ Զաքարյանին հաջողվում է իր ֆոնդի մեջ ներգրավվել 25.000  մարդ: Ի դեպ,  նույն ագրեսիվ գովազդի միջոցով  վերջինս ՀՀ-ում 18%-ով  ավանդ է հավաքում բնակչությունից:

Մի օր՝ավելի ճիշտ  26.10.2008թ-ին,  ֆոնդի բաժնետոմսերն  արժեզրկվում են ոչ ավել, ոչ պակաս  90%-ով: Սա նշանակում է, որ  եթե դուք ունեիք ֆոնդում դիցուք 1000 ԱՄՆ դոլար, ապա մեկ օր հետո ձեր գումարը վերածվում է 100 ԱՄՆ դոլարի: Սա այն դեպքում, երբ նավթն ու ոսկին, որտեղ  ներդրված էին ֆոնդի գումարները, միջազգային բորսայում չեն արժեզրկվում: Ուղղակի հետագա պարզաբանումների ժամանակ պարզվում է, որ ֆոնդի և հաճախորդի միջև կնքված պայմանագրում մանր տառերով գրված է, որ ֆոնդը իրավունք ունի ոսկու և նավթի ոլորտներից  բացի ներդրումներ կատարել իր հայեցողությամբ, որտեղ ցանկանա:

Ֆոնդի հաճախորդների ընդհանուր կորուստը, ըստ լուրերի,  կազմում է  ոչ ավել,  ոչ պակաս մոտավորապես 25.000.000 ԱՄՆ դոլար:

Եվ այս ամենից հետո մեր հերոս Գագիկ Զաքարյանը  հաղորդագրություն է տարածում, որտեղ  արցունքն աչքերին նշում է.  « Ես ինքս և  «Յունաստրոմ»  բանկի ղեկավարությունն անկեղծ ցավում ենք այն իրադրության համար, որի մեջ հայտնվել են  «Պրեմիեր»  ֆոնդի  փայատերերը»:

Իրոք այսպիսի մարդու բերանից ելած խոսքերն արժանի փոխհատուցում են Գագիկ Զաքարյանի ղեկավարած ֆոնդի կողմից 25.000.000 ԱՄՆ  դոլար  «քցված»  բաժնետերերի համար:

Ավելացնենք նաև,որ հարուցված քրեական գործը կարճվել է ,իսկ քաղաքացիական գործերը ավարտվել են ի վնաս փայատերերի:

Այսինքն՝   ֆոնդ  «Պրեմիեր»  ինքնաթիռը թռիչքից հետո բարեհաջող վայրեջք է կատարել:

Իսկ այժմ ներկայացնենք  «Պրեմիեր»  կոչվող ֆոնդի՝  «ինքնաթիռի անձնակազմին».

1.Միքայել Կորոլյուկ՝ գլխավոր թրեյդեր: Նախկինում զինվորական բժիշկ, նեյրովիրաբույժ,  ով միանգամից փոխել է մասնագիտությունը և դարձել «Պրեմիեր»  ֆոնդի գլխավոր թրեյդեր: Սիրում է, որ իրեն անվանեն Մոյշա:

2.Դենիս Եգանով՝ «Յունիաստրոմ»  բանկի վարչության նախագահի տեղակալ, «Պրեմիեր»  ֆոնդի  կառավարիչ: Նույնպես հետաքրքիր անձնավորություն է: Ազատ ժամանակ զբաղվում է բոքսով:

Ֆոնդի պայթյունից հետո  մեկ անգամ հանդիպել է քցված փայատերերի հետ: Այնուհետև դուրս է եկել աշխատանքից և հեռացել անհայտ ուղղությամբ՝ մի խոսքով փախել է:

 Իսկ ահա նրանց ղեկավարը ՝  «Յունիաստրոմ» բանկի խորհրդի նախագահ Գագիկ Զաքարյան:

Այսօր Գագիկ Զաքարյանի կողմից ղեկավարվող Հայկական «ՅունիԲանկ» -ն ագրեսիվ գովազդ է իրականացնում և ազգաբնակչությունից 18% տարեկան տոկոսադրույքով ավանդներ է վերցնում:

Տվյալ օդանավի նավապետն  անփոփոխ է՝ նույն Գագիկ Զաքարյանն է,իսկ ովքեր են մնացած օդաչուները կներկայացնենք հաջորդիվ: