Զինծառայողի հարազատները մասնակցել են դիակի դատաբժշկական փորձաքննությանը

Զինծառայող Արթուր Մարգարյանի մահվան գործով նշանակված դիակի դատաբժշկական փորձաքննությանը մասնակցել են նաև նրա հարազատները: Այդ մասին «Փաստինֆո»-ի թղթակիցը տեղեկացավ ՀՀ քննչական կոմիտեից:

Հաշվի առնելով հարցի կարևորությունը՝ վարույթ իրականացնող մարմնի թույլտվությամբ զինվորի հարազատները ևս մասնակցել են դիակի դատաբժշկական փորձաքննությանը:

Նշենք նաև, որ երեկ N զորամասի պահակակետից քիչ հեռու հայտնաբերվել է հերթապահություն իրականացնող պարտադիր ժամկետային զինծառայող, շարքային Արթուր Մարգարյանը՝ կրծքավանդակի շրջանում հրազենային մարմնական վնասվածքով:

Զինվորական հոսպիտալ տեղափոխելու ճանապարհին զինծառայողը մահացել է:

Քննչական կոմիտեից հայտնեցին, որ նախանշանները վկայում են, որ զինվորն ինքնասպանություն է գործել, և պատճառները, դեպքի բոլոր հանգամանքները պարզելու համար հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասով: