Զինվորին «կատակով» նվաստացրել, հասցրել են ինքնասպանության.1-in.am

1-in.am-ը գրում էՎերաքննիչ քրեական դատարանի վարույթում է համածառայողների կողմից զինվորին ինքնասպանության հասցնելու, ինչպես նաև զինծառայողների փոխհարաբերությունների կանոնագրքային կանոնների խախտումների գործով բերված վերաքննիչ բողոքի քննությունը:

Այս գործով վեց զինծառայողներ ամբաստանյալի կարգավիճակ ունեին, սակայն նրանցից երեքի մասով քրեական գործի վարույթը Տավուշի մարզի ընդհանուր իրավասության դատարանը Սամվել Մարդանյանի նախագահությամբ կարճել է՝ վաղեմության ժամկետներն անցած լինելու հիմքով:

Երկու ամբաստանյալների մասով կայացված որոշումները վերաքննիչ ատյանում բողոքարկում է տուժողի՝ ինքնասպան եղած զինվորի իրավահաջորդը:

Ըստ դատական ակտի՝ շարքային Նասլեդ Բ.-ն՝ ժամկետային զինծառայող, գնդացրորդ, կոչումով՝ շարքային, 2015 թվականի սեպտեմբերի 25-ից հոկտեմբերի 9-ը ընդգրկված լինելով մարտական հերթապահության մեջ, գործով չպարզված օրը, առավոտյան ժամը 8-ի սահմաններում հանդիսանալով դիտորդ, նույն դիրքում որպես դիտորդ նշանակված շարքային Արտյոմ Պ.-ին քնից աթնացնելու հարցի շուրջ վերջինիս հետ վեճի մեջ է մտել, որի ընթացքում ստորադասության հարաբերությունների բացակայության պայմաններում խախտել է զինծառաողների փոխհարաբերությունների կանոնագրքային համապատասխան կանոնները՝ գետնատնակի մոտակայքում հայհոյանքներ հնչեցնելով՝ ծեծել է Արտյոմ Պ.-ին՝ ոտքերով ու ձեռքերով անկանոն հարվածներ հասցնելով նրա մարմնի տարբեր մասերին:

Այս նույն միջադեպի ժամանակ դրսևորած համանման վարքի ու նույն կանոնների խախտման համար մեղադրանք էր առաջադրվել ու Նասլեդի հետ ամբաստանյալի աթոռին էր շարքային Արտյոմ Պ.-ն, ում մասով նույնպես քրեական գործի վարույթը կարճվել է վաղեմության ժամկետներն անցնելու հիմքով:

Արտյոմ Պ.-ի մասով, ինչպես նաև Նասլեդ Բ.-ի մեղադրանքի՝ Արտյոմ Պ.-ին առնչվող մասով տուժողի իրավահաջորդի կողմից բողոք չի բերվել:

Բացի վերը հիշատակվածից՝ շարքային Նասլեդ Բ.-ն մեղադրվում էր նաև այն բանի համար, որ 2016 թվականի մարտի 11-ից 25-ը նշանակված լինելով մարտական հենակետում որպես դիտորդ, մարտի 12-ին, ժամը 20-ից 22-ն ընկած ժամանակահատվածում նույն հենակետում որպես դիտորդ նշանակված Կամո Մ.-ին դիտակետում պառկած տեսնելու պատճառով վիրավորական արտահայտություններ է հնչեցրել վերջինիս հասցեին՝ անպարկեշտ կերպով ստորացնելով նրա պատիվն ու արժանապատվությունը:

Նասլեդ Բ.-ին մեղադրանք էր առաջադրվել ՀՀ քրեական օրենսգրքի 359 հոդվածի 1-ին և 360 հոդվածի 1-ին մասերով:

Ժամկետային զինծառայող, շարքային Հայկ Ղ.-ին մեղադրանք էր առաջադրվել այն բանի համա, որ նշանակված լինելով մարտական հենակետում որպես դիտորդ, 2016 թվականի մարտի 11-ից 14-ը բազմիցս, իբրև կատակ, համածառայողների ներկայությամբ շարքային Կամո Մ.-ի հասցեին տարբեր նվաստացուցիչ արտահայտություններ է արել, նաև ձեռքով հարվածել է նրա պարանոցին, ոտքով՝ հետույքին: Մարտի 14-ին, գիշերվա ժամը 2-ի սահմաններում Հայկ Ղ.-ն, ըստ մեղադրանքի, Կամո Մ.-ի կողմից դիտակետ բջջային հեռախոս տանելու համար հայհոյել է նրան: Մոտ մեկ ժամ անց՝ ժամը 3-ի սահմաններում, սեփական նախաձեռնությամբ կրակակետում ծառայությունը ստուգելու ժամանակ նույն դիտակետում Կամո Մ.-ին կիսապառկած վիճակում նկատելով՝ Հայկ Ղ.-ն հայհոյանք է հնչեցրել Կամոյի հասցեին՝ անպարկեշտ կերպով ստորացնելով նրա պատիվն ու արժանապատվությունը, ինչի արդյունքում Կամո Մ.-ի մոտ զարգացել է «հարմարվողականության խանգարում, ռեակտիվ դեպրեսիա» հոգեկան գործունեության ոչ փսիխոտիկ բնույթի խանգարում: Կամո Մ.-ն, ըստ դատական ակտի, այլ ելք չգտնելով, նույն օրը՝ մարտի 14 –ին, ժամը 14-ից 16-ն ընկած ժամանակահատվածում կրակակետում որպես դիտորդ ծառայություն իրականացնելու ընթացքում ինքնասպան է եղել՝ իրեն ամրակցված ինքնաձիգից կրակոց արձակելով իր ստորկզակային շրջանում:

մանրամասն՝այստեղ: