Զզվելի է և տհաճ քաղաքական ուժերի կեցվածքը

«Ղարաբաղ» կոմիտեի նախկին անդամ Աշոտ Մանուչարյանը նախընտրում է խոսել օրինակ, թե ինչպես են Երևանում կայարանի շրջակայքում տեղակայված տնային տնտեսություններից մեկում կաղամբ աճեցրել և այդ կաղամբը թռցրել են, կամ թե ինչպես Է դիրքում կանգած տղաներից մեկի կինը երեխա է ունեցել, եւ և կամ մեկ այլ հետաքրքիր պատմության մասին, քան մեկնաբանել Ազգային ժողովի քաղաքական ուժերի անթույլատրելի պահվածքն ու կեցվածքը:

Fnews.am-ի հետ զրույցում Աշոտ Մանուչարյանը նշեց, որ դա մեր անկումն է, մեր էության խախտումն է և մենք այդպիսին չպետք է լինեինք: «Մեզ տվել են մի արհեստական միջավայր, բաժանել կուսակցություների, տվել են լրատվամիջոցներ ու մենք անպայման պետք է միմյանց հանդեպ ատելություն տարածենք, իրար հոշոտենք, որովհետև էդպիսին է ճանապարհը մարդկության… դա անթույլատրելի պահվածք է…»,-նկատում է Մանուչարյանը: Ըստ նրա, եթե նման հարցերի ուշադրություն չդարձեն կողքից, ապա քաղաքական ուժերը նման անհեթեթությամբ չէին զբաղվի, այլ կզբաղվեին այն հարցերով, ինչին հասարակությունն սպասում է:

Որպես այդպիսին, Աշոտ Մանուչարյանը մատնանշում է Ղարաբախի հարցը: «Ղարաբաղ» կոմիտեի նախկին անդամի դիտարկմամբ` այս իրավիճակը խարսխված է մեկ այլ հիմքի վրա. Ժողովուրդը խոսում է լավ կյանքից, ուզում է լավ կյանքով ապրի և առաջնորդ է փնտրում` դեպի այդ լավ կյանքը գնալու, բայց պետք է ձևակերպի, թե ինչ է հասկանում լավ կյանք ասելով: «Ժողովուրդը 88-ից հետո մոտովորապես տվեց լավ կյանքի սահմանումը. սա ունեմ, սա ունեմ, սա ունեմ… բայց պարզվեց, որ այդ ամենը ապահովելոււ համար պետք է իրար հոշոտենք և մասնակցենք համաշխարհային հոշոտման գործընթացին … մենք սրանից չենք ուզում հեռու կանգնենք: Եթե մենք մնանք այդ լավ կյանքի սկզբունքի վրա, ապա կունենանք այդպիսի ընդդիմադիր դաշտ ու, եթե նրանց բոլորին տապալենք, ապա կլինենք նույնը ինչ որ իրենք են, միգուցե ավելի վատ…»,-եզրափակեց Աշոտ Մանուչարյանը:

Ռեժիսոր Աշոտ Ադամյանն էլ,Fnews.am-ի հետ զրույցում նկատեց, որ ընդդիմադիր դաշտ կոչվածում կան ուժեր, որոնք իսկապես արհեստական ընդդիմություն են: Ինչ վերաբերում է նրան, թե էթիկական տեսակետից ինչպես են շփվում իրար հետ ընդդիմադիր և իշխանական դաշտի կուսակցությունները, ապա Աշոտ Ադամյանը այն որակում է «զզվելի»: «Զզվելի է, քանի որ բարոյականության բոլոր նորմերը խախտված են, քանի որ երկիրը պետականության տեսանկյունից բարոյալքված է և նման իրավիճակներ սպասելի են… Այստեղ գտնել բարոյական ընթացքներ փոխհարաբերությունների մեջ, կարծում եմ մանկամտություն կլինի: Սա հետևանք է նրա, որ երկրում բարվոք չէ վիճակը, շատ տագնապալից վիճակ է»,- նկատեց Աշոտ Ադամյանը:

Դիտարկմանը, թե ԱԺ-ում Նիկոլ Փաշինյանի կողմից հնչած «մեղադրանքերը» հիմնականւոմ անձնավորված չէին, սակայն դրանք անմիջապես գտնում էին իրենց հասցեատերերին ու արձագանք ստանում, արվեստագետը պատասխանեց, որ անուններ հարկավոր չէր տալ, քանի որ բոլորն իրար ճանաչում են: «Եթե ճանաչում են, ուրեմն բոլորը գիտեն շան գլուխը որտեղ է թաղված: Ինչ-որ ձևեր են թափում, թե ոչ մեկը չգիտի, թե որտեղ է թաղված շան գլուխը, բայց չէ՞ որ այն մարդիկ, ովքեր բանեցնում են տրամաբանություն՝ գիտեն ու հասկանում են… Սա մի կողմից, մյուս կողմից էլ՝ Հայաստանն այն մե~ծ երկիրը չէ… Մենք էստեղ բոլորս էլ` մեր հարևաններից սկսած, մինչև վերջ բոլորին ճանաչում ենք` գիտենք ով ինչ ա, ինչ չի… Նույնիսկ ակնարկն է բավական, որ մեղավորը հասկանա, որ խոսքն իրեն է ուղղված»,- նկատեց Աշոտ Ադամյանը: Նրա գնահատմամբ` այս դրսևորումները տհաճ են. «Դրախտային վիճակում չենք, իհարկե տհաճ են.. երկրի վիճակն էլ է տհաճ… և այս ամենը փոխկապակապակցված վիճակ է… փոխհարաբերությունների շղթան բացասական նշանով է գնում»:

Հիշեցնենք, որ ՀԱԿ խմբակցության պատգամավոր Նիկոլ Փաշինյանը ԱԺ-ում իր ելույթում անդրադարձել է նախօրեին իրեն քննադատած քաղաքական ուժերի ներկայացուցիչներին, ինչը դուր չեկավ խորհրդարանական որոշ ուժերի: ՕԵԿ խմբակցության ղեկավար Հեղինե Բիշարյանը նույնիսկ տեղից բղավեց, թե «Շիշը գլխիդ կտամ, այ համբալ», ինչին ի պատասխան Փաշինյանն արձագանքեց. «Վալերյանկա չկա՞, հանգստացի մի հատ»… բանավեճին խառնվել էր նաև ԲՀԿ ղեկավար Նաիրա Զոհրաբյանը, ում ևս Փաշինյանը չէր խնայել: