Գերմանիայի եւ Հայաստանի Կարմիր խաչի երիտասարդական կազմակերպությունները հանդես են գալիս համատեղ ծրագրով

«Օգնել. ես կարող եմ, դու կարող ես, մենք կարող ենք...» ծրագրի շրջանակում Հայաստանում են Գերմանիայից ժամանած՝ գերմանական Կարմիր խաչի երիտասարդական կազմակերպության անդամները: Ծրագրի նպատակն է հաշմանդամություն ունեցող անձանց ևս ներգրավել հասարակական կյանքին: Հայկական Կարմիր խաչի երիտասարդական բաժնի ղեկավար Կատարինա Վարդանյանն այսօր լրագրողների հետ հանդիպմանն ասաց, որ համագործակցությունը գերմանական Կարմիր խաչի հետ սկսվել է դեռևս Սպիտակի երկրաշարժից հետո: Այս երկիրն առաջիններից էր, որ եկավ և կանգնեց երկրաշարժից տուժածների կողքին: Գերմանիայի և Հայաստանի Կարմիր խաչի երիտասարդական կազմակերպություններն արդեն տասը տարուց ավելի փոխայցելություններ են կազմակերպում: Այժմ իրականացվող ծրագիրը 14-18 տարեկան երեխաների համար է, ովքեր հատուկ կարիք ունեն. «Ծրագրի կարևոր նպատակներից են՝ առաջին օգնության հիմունքների ներկայացում, մարդասիրական արժեքների կարևորության բարձրացում երիտասարդության շրջանում»: Գերմանիայից ժամանած երիտասարդները ասուլիսի ընթացքում նշեցին, որ ծրագրի հիմնական նպատակն է տեսնել, թե ինչ խտրականություն կա հաշմանդամ և նորմալ երեխաների միջև, սակայն առավել կարևոր է մարդ հասկացությունը, ոչ թե հաշմանդամությունը: Ֆիլիպը, որն արդեն հասցրել էր շփվել հայ պատանիների հետ, ասաց, որ բավականին տարբերություններ կան իրենց և հայ երեխաների միջև. այստեղ երեխաները շատ են ուշադրություն դարձնում՝ հեռախոսը iPhone 5 կամ iPhone 4 է, թե ոչ: