26-ամյա Նարեկը հանուն 15-ամյա աղջկա հետ ամուսնության «կոտորել» է իրեն, բայց հիմա ընտանիքին պահել չի ուզում

Վերաքննիչ քրեական դատարանում ավարտվեց Նարեկ Դ.-ի գործով բերված վերաքննիչ բողոքի քննությունը:

Գործը քննվել է Արարատի և Վայոց Ձորի մարզերի ընդհանուր իրավասության դատարանում Ռոբերտ Պապոյանի նախագահությամբ:

26-ամյա Նարեկը բարձրագույն զինվորական կրթություն ունի, պայմանագրային զինծառայող է՝ դասակի հրամանատար, կոչումով էլ կապիտան է:

Սպայի ուղի բռնած այս երիտասարդի խնամքին, ըստ դատական ակտի՝ անչափահաս կինն ու մի քանի ամսական որդին են:

Ճիշտ է, վերաքննիչ դատարանում դատական նիստի ավարտից հետո պարզվեց, որ անչափահաս կինն ու տասն ամսական մանկիկը, երեխայի ծնվելուց ի վեր, Նարեկի հետ չեն ապրել, չափահաս այս հայրիկը՝ սպայական կոչումով, իր երեխային ու անչափահաս կնոջը նյութապես չի էլ աջակցել ոչ մի օր:

Բայց անչափահաս կինը, չուզենալով վատություն անել իր երեխայի չափահաս հայրիկին և տվյալ սպայից ավելի արժանապատվություն դրսևորելով՝ չբողոքեց, ասաց. «Նա այս պահին նյութական հնարավորություն չունի, բայց իմ ամուսինն է, իմ երեխայի հայրը, ես չեմ ցանկանում, որ ազատազրկվի»:

Կապիտան Նարեկը դատապարտվել է անչափահաս աղջկան իրեն կին դարձնելու, նրա հետ սեռական հարաբերություններ ունենալու, իսկ մինչ այդ էլ նրան առևանգելու համար:

Ըստ դատական ակտի՝ Նարեկ Դ.-ն 2012 թվականի սեպտեմբերին ծանոթացել է 1997 թվականի նոյեմբերի 8-ին ծնված, դեռ 15-ը չբոլորած աղջկա՝ Գ.-ի հետ:

Հավանել է աղջկան, շփվել է հետը: Մասնակցել է աղջկա 15-ամյակի տոնակատարությանը, աղջկա ծնողներից թույլտվություն է խնդրել, որ հանդիպեն:

Աղջկա հարազատները զգուշացրել են, որ աղջիկը դեռ փոքր է, գոնե մինչև տասնվեց տարեկան դառնալը նրան չեն ամուսնացնելու:

Նարեկը համաձայնել է, բայց դեկտեմբերի 2-ին աղջկա հետ իր մեքենայով դուրս է եկել զբոսնելու, եկեղեցի են գնացել, սակայն հետո աղջկան տուն չի վերադարձրել, այլ մեքենան քշել է դեպի իրենց գյուղ:

Աղջիկը, հասկանալով Նարեկի մտադրությունը, զանգահարել է քրոջը, հայտնել, թե ինչ է կատարվում: Աղջկա հայրն ու քեռին մեքենայով շտապել են նրանց հետևից, Մասիս քաղաքի մոտ կանգնեցրել են Նարեկի մեքենան, աղջկան վերադարձրել են տուն: Նարեկի արարքի մասին աղջիկն ու իր հարազատները իրավապահներին չեն հայտնել:

1-in.am