Հավաքագրող կավատը, ով իր սեփական դստերն էլ էր ուղարկել մարմնավաճառության, դատապարտվեց 12 տարվա ազատազրկման

Թրաֆիքինգի զոհերը...

Կենտրոն-Նորք-Մարաշ ընդհանուր իրավասության դատարանում` դատավոր Ա. Վարդանյանի վարույթում քննվող մարդկանց վաճառքի գործով անցնող ամբաստանյալների հետ կապված արդեն կա դատավճիռ: Մասնավորապես` «Աղունիկ Այվազյանը ճանաչվել է մեղավոր 2006թ. հուլիսի 16-ի փոփոխությամբ պատասխանատվություն նախատեսող, սակայն գործող խմբագրությամբ ՀՀ քրեական օրենսգրքի 132-րդ հոդվածի 3-ին մասի 1-ին կետով նախատեսված հանցագործության կատարման մեջ, նրա նկատմամբ նշանակվել է պատիժ` ազատազրկում 11 (տասնմեկ) տարի ժամկետով` առանց գույքի բռնագրավման և առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքի զրկման։
Իսկ նույն գործով անցնող` Ծովիկ Ավետիսյանը ճանաչվել է մեղավոր մինչև 2011թ. ապրիլի 9-ի փոփոխությունը պատասխանատվություն նախատեսող, սակայն գործող խմբագրությամբ ՀՀ քրեական օրենսգրքի 132-րդ հոդվածի 3-ին մասի 1-ին կետով նախատեսված հանցագործության կատարման մեջ, նրա նկատմամբ նշանակել պատիժ` ազատազրկում 10 (տաս) տարի ժամկետով` առանց գույքի բռնագրավման և առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքի զրկման։
ՀՀ քրեական օրենսգրքի 66-րդ հոդվածի 4-րդ և 6-րդ մասերի կիրառմամբ սույն դատավճռով նշանակված 10 (տաս) տարի ժամկետով ազատազրկումը մասնակիորեն գումարելով Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2013թ. մայիսի 2-ի դատավճռով Ծովիկ Ավետիսյանի նկատմամբ նշանակված 10 (տաս) տարի 6 (վեց) ամիս ժամկետով ազատազրկմանը` առանց գույքի բռնագրավման և որոշակի պաշտոններ զբաղեցնելու կամ որոշակի գործունեությամբ զբաղվելու իրավունքի զրկման, Ծովիկ Համազասպի Ավետիսյանի նկատմամբ որպես վերջնական պատիժ նշանակել ազատազրկում 11 (տասնմեկ) տարի ժամկետով` առանց գույքի բռնագրավման և որոշակի պաշտոններ զբաղեցնելու կամ որոշակի գործունեությամբ զբաղվելու իրավունքի զրկման։
Հիշեցնենք, որ համաձայն դատախազ Արմեն Մարուխյանի հրապարակած մեղադրական եզրակացության` Աղունիկ Այվազյանը Արաբական Միացյալ Էմիրություններում բնակվող մի խումբ անձանց հետ ստեղծել է կազմակերպված հանցավոր խումբ` մարմնավաճառներ հավաքագրելու եւ Էմիրաթներում շահագործելու նպատակով:

Աղունիկն ու Ծովիկը Հայաստանից հավաքագրել են կանանց, համոզել են, նրանց անձնագրի պատճենն ուղարկել են հանցավոր խմբի ղկավարին, իսկ վիզան ու տոմսը ստանալուն պես կանանց են ուղարկել Դուբայ: Գործի այս դրվագով երեք տուժող կա, որոնցից երկուսին հավաքագրել եւ Դուբայ է ուղարկել Աղունիկ Այվազյանը, իսկ մյուսին` Ծովիկ Ավտիսյանը: Եվ ահա վերջին դատական նիստում հանցավոր խմբի կողմից Էմիրաթներում սեռական շահագործման ենթարկված կանայք դատարանում ցուցմունք տալիս պատմեցին իրենց գլխին եկածը:
Տուժողներից մեկը պնդում է, որ իրեն ուղարկել են խաբելով, թե տնային աշխատողի գործ պիտի անի: Երկու տարի մնացել է այնտեղ. ՙՈչ լեզու գիտի, ոչ բան: Երկու տարի հետո մարմնավաճառ Ս.-ի հետ գնացինք, հանձնվեցինք էնտեղի ոստիկանությանը՚:

Նառան ասել, որ Կարինեն  եւս  պիտի զբաղվի մարմնավաճառությամբ... 

Գործով մյուս երկու տուժողներին նախաքննության ավարտին արդեն գտնել չի հաջողվել: Բայց նախաքննության սկզբում նրանք հարցաքննվել են: Ըստ այդմ էլ` տուժողներից Կարինեն պատմել է, որ ապրում է Հայաստանի փոքր քաղաքներից մեկում, հիվանդ անչափահաս որդի ունի: Աղունիկը նրան եւս առաջարկել է տուն մաքրողի աշխատանք Դուբայում` ամիսը 500 դոլար աշխատավարձով: Եվ այնքան ՙմեծահոգի՚ է եղել, որ Դուբայ մեկնելու հարցում տատանվող Կարինեին մեկ ամսվա աշխատավարձը` 500 դոլարը, կանխավճար է տվել, եւ նա 2009 թվականի օգոստոսի 4-ին մեկնել է Դուբայ: Այնտեղ Կարինեին դիմավորել է Սիլվա անունով մի կին եւ նրան տարել է երեք սենյականոց մի ճոխ բնակարան: Այնտեղ վերցրել են Կարինեի բջջային հեռախոսն ու անձնագիրը, որից հետո նրան ներկայացրել են խմբի պարագլխին` Նելին:
Այնուհետեւ Կարինեին տարել են մեկ այլ բնակարան, որտեղ ապրում էին յոթ-ութ հայ կանայք: Կարինեն նրանց տեսքից հասկացել է, որ մարմնավաճառներ են: Կանանցից մեկն էլ` Նառան, ասել է, որ Կարինեն եւս պիտի զբաղվի մարմնավաճառությամբ, պարտավոր է օրական վեց հարյուր դոլար աշխատել ու ամբողջ գումարը հանձնել Նելիին: Դրա փոխարեն ամեն ամիս Հայաստան` Կարինեի երեխային պահող բարկամուհուն կուղարկվի հինգ հարյուր դոլար: Իսկ 2 տարի հետո Կարինեի համար բնակարան կգնեն Հայաստանում` նրա հայրենի քաղաքում:
Կարինեն սկզբում չի ցանկացել մարմնավաճառությամբ զբաղվել, բայց ուրիշ ելք չկար: Եվ ահա Դուբայ հասնլու երրորդ օրը նա անցնում է ՙաշխատանքի՚: Հաճախորդնրի հետ բանակցություններ են վարել արդեն փորձ ունցող հայ մարմնավաճառուհիները: Նրանցից մեկն էլ բոլորից հավաքել է օրական վեց հարյուր դոլարները եւ հանձնել է Նելիին...
Գործով անցնող երրորդ տուժող Գոհարը եւս Դուբայում է հայտնվել տուն մաքրող կամ ուտելիք եփող աշխատելու հույսերով: Չի ասել, թե մարմնավաճառության է ուղարկում: Դուբայում եւս ամենի ինչ ընթացել է նույն սցենարով` Սիլվա, Նելի, բնակության համար հանրակացարան` տասը հայ մարմնավաճառուհիների ընկերակցությամբ: Էլի օրական 600 ՙնալոգ՚, որը չվճարելու դեպքում կարող էին թողնել փողոցում` սոված, ՙանլեզու՚, առանց փաստաթղթերի...
Ութ ամիս մարմնավաճառություն անելուց հետո Գոհարն այլեւս չդիմանալով, դիմել է փախուստի: Մնացել է փողոցում, տարբեր սրճարաններում: Նելին նրան գտել է, փորձել ստիպել, որ նա վերադառնա մարմնավաճառությանը, բայց Գոհարը կտրականապես հրաժարվել է: Նելին տեսնելով, որ նրանից օգուտ չկա, տոմս է գնել, ուղարկել Թբիլիսի, որտեղ Գոհարին դիմավորել ու Հայաստան է բերել Աղունիկը:

Ութ ամսվա մարմնավաճառության, օրական վեց հարյուր դոլար աշխատելու պարագայում Նելին Գոհարին վճարել է... 2 հազար դոլար ու գնել է նրա տոմսը:
Հավելենք, որ թրաֆիքինգով զբաղվող այս կազմակերպված խմբի գործի այլ դրվագներով արդեն դատապարտվել է ինը հոգի: Այս գործով դատապարտվել են նաեւ Ծովիկ Ավետիսյանի երկու որդիները, իսկ դուստրը, որպես շարքային մարմնավաճառ, նույնպես ուղարկվել է Դուբայ` Նելիի մոտ: Գործի այլ դրվագներով Աղունիկ Այվազյանը դատապարտվել է 11 տարի, 7 ամիս, իսկ Ծովիկ Ավետիսյանը` 10 տարի, 6 ամիս ազատազրկման: Չորս մարդ, այդ թվում` խմբի պարագլուխ Նելին, հետախուզման մեջ են, մեկ հետախուզվող հայտնաբերվել է:

Նոնա   Ադամյան