«Թրանսփարենսի Ինթերնեշնլ հակակոռուպցիոն կենտրոն» ՀԿ-ն Բյուրեղավանի գիշերօթիկի հարցով դիմել է դատարան

«Թրանսփարենսի Ինթերնեշնլ հակակոռուպցիոն կենտրոն» ՀԿ-ն Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան բողոք է ներկայացրել՝ Բյուրեղավանի գիշերօթիկ դպրոցում հայտնաբերված անօրինությունների վերաբերյալ հանցագործության մասին հաղորդումը պատշաճ քննության չենթարկելու, գործի բազմակողմանի, օբյեկտիվ և լրիվ քննություն չիրականացնելու և նշված հանգամանքների շուրջ դատախազի կողմից վերահսկողություն չիրականացնելու դեմ:

Այս մասին «Փաստինֆո»-ին հայտնեց «Թրանսփարենսի Ինթերնեշնլ հակակոռուպցիոն կենտրոն»-ի փախտնօրեն Սոնա Այվազյանը:
Ինչպես նշեց մեր զրուցակիցը, նոյեմբերի 12-ին ներկայացված դիմումին դատարանից առայժմ պատասխան չի ստացվել:

Հիշեցնենք՝ սույն թվականի ապրիլի 18-ին մի շարք ՀԿ-ներ, որոնց թվում նաև «Թրանսփարենսի Ինթերնեշնլ հակակոռուպցիոն կենտրոն»-ը, Բյուրեղավանի գիշերօթիկ դպրոցի աշխատակիցների՝ մամուլում հրապարակված բաց նամակի հիման վրա, հանցագործության մասին հաղորդում էին ներկայացրել ՀՀ գլխավոր դատախազին:

Խոսքը, մասնավորապես, տնօրենի կողմից կատարվող յուրացումների, չարաշահումների, երեխաների նկատմամբ ծեծի և բռնության, ինչպես նաև նախարարության կողմից հնարավոր հովանավորչության մասին էր:

Ի դեպ, այս հաղորդման հետքերով գիշերօթիկ էր այցելել նաև վարչապետ Հովիկ Աբրահամյանը, նկատողության էր արժանացել Աշխատանքի և սոցիալական հարցերի փոխնախարար Ֆիլարետ Բերիկյանը, աշխատանքից ազատվել էր դպրօցի տնօրենը, հարուցվել էր նաև քրեական գործ:

Սակայն, ինչպես մեզ հետ զրույցում հայնեց Սոնա Այվազյանը, ԹԻՀԿ-ում կարծում են, որ «անցած վեց ամիսների ընթացքում հաղորդումը պատշաճ քննության չի ենթարկվել, քննությունն ընթացել է միակողմանի, հաղորդման մեջ նշված հանգամանքները ամբողջովին չեն բացահայտվել և մեղադրանքներ չեն առաջադրվել, չի կատարվել օբյեկտիվ և բազմակողմանի քննություն»: