Դիվերսիոն գործողությունը կանխելու ժամանակ հակառակորդի կրակոցից սպանված 19-ամյա Գարիկն ընտանիքի միակ հույսն ու սյունն էր

Ղարաբաղա-ադրբեջանական հակամարտության զորքերի շփման գծում դեկտեմբերի 8-ին, հակառակորդի կողմից արձակված կրակոցից զոհված 19-ամյա Գարիկ Իսպիրյանը ընտանիքի միակ հույն ու սյունն էր: Այս մասին SHAMSHYAN.com-ի թղթակցի հետ զրույցում ասաց Գեղարքունիքի մարզի Գեղհովիտի գյուղապետ Վարդան Պողոսյանը: Նա նշեց, որ Գարիկը նաեւ մեկ եղբայր ունի, որը վատառողջ է, որի պատճառով անգամ ազատվել է ծառայությունից: Ավելին՝ ընտանիքը սոցիալապես շատ անապահով է: Իսկ հայրն էլ չորս անգամ վիրահատվել է: Ամբողջ գյուղը ցնցված է կատարվածից ու նրա ծնողների հետ սգում է Գարիկի անժամանակ մահը: Այսօր նրա դին կտեղափոխեն գյուղ, իսկ վաղը տեղի կունենա հուղարկավորությունը: Ավելի վաղ տեղկացրել էինք, որ ԼՂՀ ՊԲ-ն հայտարարել էր, որ Ղարաբաղա-ադրբեջանական հակամարտության զորքերի շփման գծի արեւելյան ուղղությամբ տեղակայված զորամասերից մեկի պահպանության տեղամասի մարտական հենակետում դեկտեմբերի 8-ին, հակառակորդի կողմից արձակված կրակոցից մահացու հրազենային վիրավորում է ստացել զինծառայող, 19-ամյա Գարիկ Արտեմի Իսպիրյանը: Հայտնել էինք նաեւ, որ նույն օրը ադրբեջանական կողմը դիվերսիոն գործողություն է ձեռնարկել ղարաբաղա-ադրբեջանական շփման գծում եւ նախնական տեղեկություններով ադրբեջանական կողմն ունի առնվազն մինչեւ 7 զոհ: