ԴԱՀԿ-ի կամ անշարժ գույքի կադաստրի պետական կոմիտեի անօրինական գործողությունների արդյունքում արգելադրված գույքն արգելանքից հանվել է. ՀՔԾ

Քաղաքացի Գևորգ Ղ.-ի հաղորդման հիման վրա ՀՀ հատուկ քննչական ծառայությունում նախապատրաստված նյութերով ՀՀ քրեական օրենսգրքի 308-րդ հոդվածի 1-ին մասով հարուցվել է քրեական գործ:

ՀՔԾ պաշտոնական կայք-էջի տեղեկացմամբ՝ Գևորգ Ղ.-ն հաղորդում է տվել այն մասին, որ գումարի բռնագանձման պահանջով հայցադիմում է ներկայացրել Երևանի Կենտրոն և Նորք-Մարաշ վարչական շրջանների ընդհանուր իրավասության դատարան` ընդդեմ Անդրանիկ Մ.-ի:

Մինչ հայցադիմում ներկայացնելը, ՀՀ ԿԱ անշարժ գույքի կադաստրի պետական կոմիտեից ստացված գրությամբ պարզվել է, որ Անդրանիկ Մ.-ին սեփականության իրավունքով պատկանել է անշարժ գույք:

Հայցադիմումի հիման վրա դատարանը կիրառել է հայցի ապահովման միջոց և ՀՀ ԱՆ ԴԱՀԿ ծառայության միջոցով արգելանք է դրվել հիշյալ գույքի վրա:

Քաղաքացիական գործով կայացված վերջնական դատական ակտն օրինական ուժի մեջ մտնելուց հետո, բռնագանձման վերաբերյալ ինքը կատարողական թերթը ներկայացրել է ԴԱՀԿ ծառայություն, սակայն հետագայում պարզվել է, որ ԴԱՀԿ ծառայության կամ անշարժ գույքի կադաստրի պետական կոմիտեի կողմից կատարված անօրինական գործողությունների արդյունքում արգելադրված գույքն արգելանքից հանվել է, Անդրանիկ Մ.-ի անվամբ հաշվառված գույք չկա, ինչի հետևանքով չի կատարվել դատարանի վճիռը և չի բռնագանձվել իրեն հասանելիք գումարը:

Կատարվում է նախաքննություն: