Մաքսիմը մեկ տարուց ավել սիրահետել Անահիտին, եւ իբր տեսնելով, որ ոչինչ չի ստացվում նույնիսկ անձնական բնույթի վիրավորանքներ է հասցրել, ու...

Fnews.am-ը  արդեն իսկ  անդրադարձել  էր դեկտեմբերի 2-ին Վանաձորի թիվ 24 միջնակարգ դպրոցի բակում տեղի ունեցած վիճաբանության, որն ավարտվել էր դանակահարությամբ: Հիշեցնենք, որ դպրոցի բակում դանակահարվել էր ոչ միայն Տիգրանը, այլ նաեւ նրա դասընկեր, 17-ամյա Ռոբերտ Պետրոսյանը: Թե, ի վերջո ի՞նչն էր դանակահարության պատճառը, Fnews.am-ը փորձեց պարզել դպրոցի տնօրեն Հասմիկ Հովսեփյանից, ով արդեն հասցրել էր զրուցել աշակերտների հետ եւ տեղեկացել էր կատարվածի մանրամասներին."Վեճը, որն ավարտվել է դանակահարությամբ եղել մեր դպրոցի աշակերտուհի` Անահիտ Ադամյանի պատճառով, ով մեկ տարի է ինչ սովորում է այստեղ: Ըստ ինձ հասած տեղեկության, իբր 16-ամյա Անահիտի նկատմամբ աշակերտները նորմալ մոտեցում ցույց չեն տվել, ամեն անգամ տեսնելուց մի-մի բան ասել են, բայց, աղջիկը, ինչպես նրա մայրն է ասել, դրան ուշադրություն չի դարձրել, չի պատասխանել, որ ավելորդ լարվածություն, կռիվ չլինի: Ըստ Անահիտի, Մաքսիմը մեկ տարուց ավել սիրահետել եւ հետապնդել է նրան, իբր տեսնելով, որ ոչինչ չի ստացվում նույնիսկ անձնական բնույթի վիրավորանքներ է հասցրել: Անահիտն էլ, իբրեւ այեւս չդիմանալով, զանգել է եղբորը` Նարեկին, ով էլ դանակահարել է աշակերտներիս` Տիրգրանին եւ Ռոբերտին: Դեպքի օրն էլ, ինչպես ինձ պատմեց Մաքսիմը (ծեծված աշակերտը-Ի. Ա.), ընդմիջման ժամին խոսակցություն է եղել իր եւ Անահիտի միջեւ, վիրավորանք չի եղել: Բայց ընդմիջման ժամին աղջկա եղբայրը եկել է դպրոց եւ դուրս հրավիրել Մաքսին, Տիգրանին եւ Ռոբերտին` զրուցելու համար: Վերջիններս էլ գնացել են` չիմանալով, թե ինչ է իրենց սպասվում, մտածել են, որ տղաներ են եկել են զրուցելու: Սկսվել է վեճ, քաշքշոց, Մաքսին ծեծել են, գցել են գետնին, ուսմասվարն ու դասղեկը չեն կարողացել կանխել, հետո Մաքսին պաշտպանելու ժամանակ դանակահարվել են Ռոբերտն ու Տիգրանը:
Տիգրանը, ով այժմ դեռ բուժվում է, վնասվածք էր ստացել կրծքավանդակի շրջանում, իսկ Ռոբերտը գոտկային շրջանում:

Ամեն դեպքում Մաքսիմը ժխտում է մեկ տարուց ավել պարբերաբար այդ աղջկան վիրավորելու փաստը, այստեղ նույնիսկ հարց է, թե ում կողմից է եղել անձնկան վիրավորանք` աղջկա՞, թե՞ տղայի: Բայց քանի որ ես այնտեղ չեմ եղել հստակ ոչինչ ասել չեմ կարող:
Բայց տնօրենի համար առնվազն զարմանալի է.."Եթե մեկ տարուց ավել որեւէ տղա որեւէ աղջկա վիրավորանքներ հասցնի, վարկաբեկի, ընդհուպ մինչեւ այն աստիճանի, որ աղջիկը ամանչում է, որ գրի: Արդյոք այդ աղջիկը չի ունեցել մեկը, ում հետ կարող էր կիսվել: Որեւէ մեկը չկա, ով կվկայի, որ Մաքսիմը գոնե մի անգամ նրան վարկաբեկել է, նվաստացրել: Չի կարող տասնվեց տարեկան երեխան այդքան իր ներսում պահել, ամբողջ 750 հոգիանոց դպրոցում չկա՞ մեկը, որ տեսած լինեն, որ Մաքսիմը գնացել է իրենց դասարան, ավելին հետապնդել է...Անահիտի ասածները հիմնավորող որեւէ ապացույց, որեւէ փաստ չկա":
Տնօրենի խոսքով."Անահիտը դեպքի օրվանից մինչ օրս դասի չի հաճախում: Դասղեկը զանգել է ծնողներին, մայրը ասել է, որ դուստրը այլեւս մեր դպրոցի չի հաճախելու, բայց փաստաթղթերը դեռ դպրոցից չեն տարել":
Նշենք, որ ՀՀ Քննչական կոմիտեում դեպքի առթիվ ՀՀ քրեական օրենսգրքի 112-րդ հոդվածի 1-ին մասով (դիտավորությամբ առողջությանը ծանր վնաս պատճառելը) հարուցվել է քրեական գործ:

Տաթեւիկ  Աբրահամյան