Դա ոչնչության արած է, եւ դա որեւէ մեկը չի կարող ժխտել.Շիրակի մարզի դատախազը`Գյումրիում տեղի ունեցած սպանդի մասին

"Տվյալ քրեական գործը Շիրակի մարզային դատախազության դատավարական ղեկավարմնան ներքո չէ, քրեական գործի քննությունն իրականացվում է Քննչական կոմիտեի կենտրոնական ստորաբաժանումը, իսկ հսկողությունը իրականացնում է գլխավոր դատախազությունը: Հետեւաբար գործի վերաբերյալ ինֆորմացիա մարզի դատախազությունը ստանում է ոչ պաշտոնապես, այսինքն պաշտոնական որեւէ տեղեկություն վերոնշյալ գործի վերաբերյալ ես չեմ կարող ասել",-Fnews.am-ի հետ զրույցում անդրադառնալով Ավետիսյանների յոթ հոգանոց ընտանիքի սպանության գործին ասաց Շիրակի մարզի դատախազ Րաֆֆի Ասլանյանը:

Ապա անդրադառնալով ոճրագործի արարքին մարզային դատախազը հավելեց."Անկախ ազգությունից դրա բնութագիրը մեկն է, դա ամենաստահակ մարդու, ոչնչության արած է, եւ դա որեւէ մեկը չի կարող ժխտել: Հատկապես մեր ազգի համար` հաշվի առնելով, որ մեր ազգն է յոթ զոհ տվել: Դա որեւէ մեկը չի վիճարկել, դա արտառոց դեպք է` արտառոց հանդգնությամբ, ամենավերջին լկտիությամբ կատարված հանցագործություն":

Հարցին, ըստ Ձեզ ի վերջո եթե Պերմյակովին Հայաստանում դատեն, նա կմնա՞ Հայաստանում, թե՞ ոչ,  դատախազը այսպես պատասխանեց. "Ճիշտն ասած ես դժվարանում եմ այդ հարցի պատասխանն ասել. դրանք ընթացակարգեր են, որոնք հերթականություն են պահանջում: Այսինքն նախ պետք է հասնել նրան, որ նա Հայաստանում դատվի, դա առաջինը: Դրանից հետո, իհարկե, որպես հայ, որպես հայ ժողովրդի մի մաս, բոլորս կուզենանք, որ պատժի կրումը մեր աչքի առաջ լինի: Անկախ նրանից` օրենսդրությունը դա թույլ կտա, թե թույլ չի տա: Բայց այստեղ խնդիրը օրենսդրական, իրավական դաշտում է եւ կողմերի միջեւ, բնականաբար կլինեն համապատասխան իրավական հաղորդագրությունները: Բայց, էլի եմ կրկնում, ինչ խոսք յուրաքանչյուր հայ կցանկանա, որ նա պատիժը մեր աչքի առաջ կրի, եւ ոչ միայն պատժվի այլեւ գնդակահարվի, թեեւ մեր օրենսդրությունը դրա հնարավորությունը չի էլ տալիս, ես սա, որպես հայ եմ ասում":

Տաթեւիկ  Աբրահամյան