Զարուհի Փոստանջյանը ԱԺ հայտարարության նախագիծ է հեղինակել՝ Գյումրիում տեղի ունեցած դաժան սպանությունների կապակցությամբ

ԱԺ «Ժառանգություն» խմբակցության լրատվական ծառայությունը ներկայացրել է պատգամավոր Զարուհի Փոստանջյանի հեղինակած Ազգային ժողովի հայտարարության նախագիծ՝ «2015թ. հունվարի 12-ին Գյումրիում տեղի ունեցած դաժան սպանությունների կապակցությամբ» Հայաստանի Հանրապետության Ազգային ժողովի հայտարարության վերաբերյալ:

Փաստաթղթում մասնավորապես ասվում է.

Հայաստանի Հանրապետության քաղաքացիները հարգում են Հայաստանի Հանրապետության և Ռուսաստանի Դաշնության՝ ռազմական ոլորտում առկա երկկողմ պայմանագրերը:

Վերոնշյալ պայմանագրերը ենթադրում են Հայաստանի Հանրապետության և Ռուսաստանի Դաշնության միջև երկկողմանի հարգանք և համագործակցություն:

Գյումրի քաղաքում տեղի ունեցած՝ Ավետիսյանների ընտանիքի սպանությունը ոչ միայն իր դաժանությամբ է ցնցել հայ հանրությանը, այլ նաև այդ եղեռնագործության քրեական վարույթի իրականացումը և մեղադրյալին կալանքի տակ վերցնելը Ռուսաստանի Դաշնության կողմից արդարացի և իրավաչափ բողոք է բարձրացրել հասարակության շրջանում:

Ռուսաստանի Դաշնության ԱԴԾ սահմանապահ կառավարման ղեկավար մարմինների կողմից Հայաստանի Հանրապետության սահմանը խախտող անձի փոխանցումը 102-րդ ռազմաբազայի ղեկավարությանը խախտել է Հայաստանի Հանրապետության Սահմանադրությունը, Հայաստանի Հանրապետության Քրեական և Քրեական դատավարության օրենսգրքերի և «Հայաստանի Հանրապետության տարածքում տեղակայված ռուսաստանյան սահմանապահ զորքերի կարգավիճակի և դրանց գործունեության պայմանների մասին» (30 սեպտեմբերի, 1992թ.) և «Հայաստանի Հանրապետության տարածքում ռուսաստանյան ռազմաբազայի մասին» (16 մարտի 1995 թ.) Հայաստանի Հանրապետության և Ռուսաստանի Դաշնության միջև կնքված պայմանագրերը:

Հայաստանի Հանրապետության Ազգային ժողովը ՀԱՅՏԱՐԱՐՈՒՄ Է՝ հետամուտ է լինելու եղեռնագործության բացահայտմանը,

ակնկալում է հանուն արդարության, օրինականության վերականգնման և հայ-ռուսական ռազմավարական դաշնակցության՝ Ռուսաստանի Դաշնությունից ողջամիտ որոշում Հայաստանի Հանրապետության քաղաքացիների օրինական պահանջը բավարարելու համար առանձնապես ծանր հանցագործության մեջ մեղադրվող Վալերի Պերմյակովին անհապաղ փոխանցել Հայաստանի Հանրապետության իշխանություններին:

ՀԻՄՆԱՎՈՐՈՒՄ

2015թ. հունվարի 12-ին Գյումրիում տեղի ունեցած դաժան սպասնությունների կապակցությամբ Հայաստանի Հանրապետության Ազգային ժողովի հայտարարության նախագծի ընդունման

12.01.2015թ. Հայաստանի Հանրապետության տարածքում՝ Գյումրի քաղաքում, կատարվել է առանձնապես ծանր հանցագործություն՝ Հայաստանի Հանրապետության յոթ անձանց սպանություն, այդ թվում երկու մանկահասակ երեխաներ, նրանցից մեկին՝ վեցամսյա Սերյոժա Ավետիսյանին պատճառվել էր ծանր մարմնական վնասվածքներ, որի հետևանքով նա մահացել է հիվանդանոցում:

Ավետիսյան Սերյոժա Կարապետի, Ավետիսյան Հասմիկ Ռաֆիկի,Ավետիսյան Աիդա Սերյոժայի, Ավետիսյան Արմեն Սերյոժայի, Ավետիսյան Արաքսյա Անդրանիկի, Ավետիսյան Հասմիկ Արմենի և Ավետիսյան Սերյոժա Արմենի սպանության գործով կասկածյալ Վալերի Պերմյակովի կողմից Հայաստանի Հանրապետության պետական սահմանը ապօրինի հատելու փորձ կատարելը կանխվել է, նրան ձերբակալել են, ձեռբակալվելուց հետո ապօրինի տեղափոխել են Գյումրիում տեղակայաված Ռուսասատանի Դաշնության 102-րդ ռազմաբազա:

Հայաստանի Հանրապետության իշխանությունների կողմից Վալերի Պերմյակովին Ավետիսյանների ընտանիքի անդամների սպանության գործով մեղադրանք է առաջադրվել Հայաստանի Հանրապետության քրեական օրենսգրքի 104-րդ հոդվածի 2-րդ մասի 1-ին կետով:

Ռուսասատանի Դաշնության ռազմաբազայի ղեկավարությունը, շրջանցելով Հայաստանի Հանրապետության Սահմանադրությունը, Հայաստանի Հանրապետության Քրեական և Քրեական դատավարության օրենսգրքերը, Հայաստանի Հանրապետության և Ռուսասատանի Դաշնության միջև կնքված պայմանագրերը, շարունակում է ապօրինի գործունեությունը՝ չփոխանցելով մեղադրյալ Վալերի Պերմյակովին Հայաստանի Հանրապետության իշխանություններին: