Սեփական` մեկ ու կես տարեկան երեխային մուրացկանության մեջ ներքաշած, թրաֆիքինգի մեջ մեղադրվող Լուսինեն զղջում է...

«Ես ընդունում եմ իմ սխալը, որ սխալ եմ եղել իմ էրեխուն ուղարկել եմ փող հավաքելու, բայց ես ոչ մեկին բացի ինձանից ու իմ էրեխուց չեմ վնասել: Ես լիքը մեղավոր եմ, սխալ եմ եղել, որ չգիտակցելով տվել եմ ուրիշի, բայց հիմա կուզենամ էրեխուս մանկապարտեզ ընդունեն ես էլ աշխատեմ իմ էրեխուն պահեմ: Էդ պահին դժվար էր, էրեխեն մենակ կրծքի կաթով էր կերակրվում, հացի-բանի համար էլի: Չեմ գիտակցել, բայց ես իմ էրեխուց երբեք չեմ հրաժարվել, ես դա դատավորին էլ եմ ասել»,- Fnews.am-ի հետ զրույցում այսպես արդարացավ սեփական` մեկ ու կես տարեկան երեխային մուրացկանության մեջ ներքաշած, թրաֆիքինգի մեջ մեղադրվող Լուսինեն, ով պարբերաբար երեխայի հետ մուրացկանությամբ է զբաղվել:

Սեփական երեխայի շահագործման մեջ մեղադրվող մայրը պնդում է, որ իրեն ոչ ոք չի ստիպել երեխային մուրացկանության տանելու համար.«Հեչ մեկն էլ չի ստիպել, ուղղակի, որ էրեխեն կրծքի կաթով չի կշտացել, դրա համար է եղել: Ուղղակի Լուսիկը` մտերմուհիս, ով երկար ժամանակ մուրացկանություն էր անում, մի օր ասեց, որ էրեխուն էլ կարա տանի  իրա հետ, շատ փող կհավաքի, ես էլ համաձայեցի, ընենց չի, որ ինձ համոզելա առավել եւս ստիպել. ըտենց բան չկա հարյուր տոկոս: Գիտեք ինչ է. օրկան մի մեծ գումար էլ չէր հավաքվում, հազիվ օրվա հացի փող էինք առնում: Բայց ես զղջացել եմ, սխալվել եմ ու դա հասկացել եմ»:
Նշենք, որ Լուսինեի նկատմամբ խափանման միջոց է ընտրվել ստորագրությունը չհեռանալու մասին, սակայն եթե մեղադրանքը հաստատվի, Լուսինեին սպառնում է 7-12 տարվա ազատազրկում:

Տաթեւիկ Աբրահամյան