ԼՂՀ բոլոր տեղամասերում ստեղծված են անհրաժեշտ պայմաններ քաղաքացիների ընտրական իրավունքի իրացման համար (Տեսանյութ)

ԼՂՀ Ընտրական օրենսգրքի պահանջներին համապատասխան` մայիսի 3–ին՝ ժամը 9.00-ին ԼՂՀ Կենտրոնական ընտրական հանձնաժողովի նախագահ Սրբուհի Արզումանյանն ուղիղ եթերով հանդես եկավ Արցախի հանրային հեռուստատեսությամբ:

Ինչպես տեղեկացնում են ԼՂՀ ԿԸՀ մամուլի կենտրոնից, Սրբուհի Արզումանյանը, ԼՂՀ քաղաքացիներին շնորհավորելով Ազգային Ժողովի հերթական ընտրությունների մեկնարկի առթիվ, հաղորդեց, որ ժամը 8-ին հանրապետության ողջ տարածքում բացվել են ընտրական տեղամասերը, որոնց թիվը կազմում է 279: Նրա խոսքով, բոլոր տեղամասերում ստեղծված են անհրաժեշտ պայմաններ դրանց բնականոն գործունեության ապահովման և քաղաքացիների ընտրական իրավունքի իրացման համար:

Սրբուհի Արզումանյանը համոզմունք հայտնեց, որ, ինչպես և համապետական նշանակության նախորդ բոլոր ընտրություններում, ներկա խորհրդարանական ընտրությունները նույնպես կանցնեն բարձր մակարդակով և ընտրողների մեծ ակտիվության պայմաններում: