Եթե իշխանությունները իբր դեմ են այս զարգացումներին, պետք է սկսեց հենց գեներալ Մանվելից ու վարչապետից

Հաճախ ենք լսում գնահատականներ, թե մեզանում քաղաքական ակտիվ կյանք գոյություն չունի, եւ որ քաղաքական կյանքը այլեւս մեռած է: Ճի՞շտ են քաղաքական դաշտի ակտիվության մասին հասարակական ընկալումները, եւ թե արդյո՞ք հեռանկարում էլ կարող է բացակայել այլընտրանքն ու առողջ ընդդիմությունը ՀՀ-ի քաղաքական դաշտում, Fnews.am-ը  հետաքրքրվեց քաղաքագետ Գագիկ Համբարյանից.

-Չեմ ուզում ասել, որ ընդդիմությունը վերացավ, բայց վերացավ ընդդիմադիր դաշտի ամենակարկառուն ու ամենահարուստ կուսակցություններից մեկը ՝ Գագիկ Ծառուկյանի ԲՀԿ-ն: Իսկ դրանից հետո ակնհայտ է, որ դաշտը պարարտ մնաց: Թեեւ ընդդիմադիր դաշտի ներկայացուցիչները ուզում են լրացնել այդ բացը.օրինակ Հիմնադիր Խորհրդարանը ՝Ժիրայր Սեֆիլյանը, ընկերների հետ փորձում է ակտիվանալ: Տիգրան Ուրիխանյանն է ձևավորում ընդդիմադիր քաղաքական կուսակցություն, եւ այլն: Հայաստանում ընդդիմադիր ուժ լինելու համար պետք է ոչ միայն խարիզմատիկ ղեկավար ունենալ, այլև պետք է ֆինանսական բավականին հզոր միջոցներ ունենալ , իսկ միջոցներն էլ պետք է գան նաև դրսից: Օրինակը բերեմ Վրաստանի դեպքում, երբ Բիձինա Իվանիշվիլին այն ընդդիմադիր ուժն էր, ով գահընկեց արեց Սահակաշվիլիին և այդ անձը քիչ բիզնես կապեր ուներ Վրաստանում : Այսինքն իշխանություններն անմիջականորեն չէին կարող ճնշել և պարտադրել նրան գնալ զիջումների: Իսկ ՀՀԿ-ն,  իր կադրային քաղաքականության մեջ վաղուց խնդիր ունի. մենք տեսնում ենք, որ Հանրապետական կուսակցությունն ունի կադրային քաղց: Չկան նոր դեմքեր. հին դեմքերը գալիս են իշխանության, դուրս գալիս, բայց նորից նրանց հետ են բերում իշխանության…Այսինքն նրանք զրկվում են իշխանությունից` իրենց հանցագործ բարեկամների պատճառով, իսկ հետո ինչ-որ ձևով հետ են գալիս իշխանություն: Սրա վառ օրինակը Սուրիկ Խաչատրյանն է: Լավ կլինի, որ ՀՀԿ-ն փնտրի նոր դեմքեր , որոնք նոր էներգիա կհաղորդեն իրենց կուսակցությանը : ՀՀԿ-ն դա կանի այն դեպքում, երբ կցանկանա աշխատել ի շահ Հայաստանի: Բայց մեզ հայտնի որ, որ ՀՀԿ-ում կա մի ստվար զանգված, որոնք գործում են ի շահ սեփական գրպանի: 

-Պարո'ն Համբարյան խոսեցիք Գագիկ Ծառուկյանի և նրա ղեկավարած ԲՀԿ-ի մասին: Գ. Ծառուկյանը հայտարարել էր, որ դուրս է գալիս մեծ քաղաքականությունից, սակայն հիմա նորից ակտիվություն է նկատվում ՝ նույն Ծառուկյանի ու նրա մերձավոր շրջապատի կողմից: Ինչպե՞ս կմեկնաբանեք Գ. Ծառուկյանի այդ ակտիվությունը:

-Կարծում եմ Գագիկ Ծառուկյանը դուրս կգա քաղաքականությունից այն դեպքում, երբ նա կհանձներ իր պատգամավորական մանդատը և կդառնար սովորական ,,ՔԱՂԱՔԱՑԻ՚՚՚՚՚ ՚ : Նա դեռ քաղաքականության մեջ է. ասեմ որ նրա պես ֆինանսական հնարավորությունների տեր մարդը չի կարող քաղաքականությունից դուրս լինել , քանի որ Հայաստանում ֆինանսապես ապահով մարդիկ պետք է անպայման լինեն քաղաքական դաշտում: Դա և՛ Գագիկ Ծառուկյանի դեպքում է այդպես, և՛ Սամվել Ալեքսանյանի, և՛ Ռուբեն Հայրապետյանի( Նեմեց Ռուբո) , Բարսեղ Բեգլարյանի ( Ֆլեշի Բարսեղ ) եւ այլն ... Նրանք բոլորն էլ քաղաքական դաշտում են:

ԻՆՉՈ՞Վ է ԳԵՆԵՐԱԼԻ ՈՐԴԻՆ ԼԱՎԸ` ՎԱՐՉԱՊԵՏԻ ՈՐԴՈՒՑ...

-Իսկ ինչպե՞ս եք գնահատում Գագիկ Ծառուկյանի խնամի ՀՀ վարչապետ Հովիկ Աբրահամյանի ձիու քայլը, երբ նա փորձում է իր որդուն` Արգամ Աբրահամյանին ո'չ ավել, ո'չ պակաս Արտաշատի քաղաքապետ դարձնել... Չհաշված, որ քաղաքապետի ընտրություններում  էլ  միակ թեկնածուն մնաց իր որդին ՝Արգամ Աբրահամյանը:

-Սա արդեն շատ վատ «ադաթ» է Հայաստանում, երբ ինչ-որ պաշտոնյա ամեն ինչ անում է, որպեսզի իր իշխանությունը ժառանգաբար փոխանցի իր որդիներին: Հ. Աբրահամյանը այս առումով առաջինը չէ. ինչու՞ ենք զարմանում: Չէ՞ որ մենք ականատես եղանք, թե ինչպես Էջմիածնում քաղաքապետ ընտրվեց գներալ Մանվել Գրիգորյանի որդին: Ինչո՞վ է գեներալի որդին լավը` վարչապետի որդուց: Ցանկացած ծնողի համար իր երեխան է ամենալավը: Կամ ինչու՞ պիտի գեներալ Մանվելը կարողանա Էջմիածնում ամեն ինչ իր որդունը դարձնել, իսկ Հ. Աբրահամյանը հարազատ Արտաշատում չկարողանա: Իհարկե ես բացարձակ դեմ եմ ընտրությունների այս կարգին: Դա կնպաստի ֆեոդալիստական համակարգի ձևավորմանն ու քաղաքական դաշտի լճացմանը: Բայց եթե իշխանությունները իբր դեմ են այս զարգացումներին, պետք է սկսեց հենց գեներալ Մանվելից ու վարչապետից: Սամվել Ալեքսանյանի եղբոր որդին ինչո՞վ է առավել վարչապետի որդուց: Ս. Ալեքսանյանի եղբոր որդին այսօր զբաղեցնում է Մալաթիա– Սեբաստիա համայնքի ղեկավարի պաշտոնը: Եթե Հովիկ Աբրահամյանի որդին չդառնար քաղաքապետ, վաղը մյուս օրը նա իշխանություններին կասեր. եթե չեք ուզում որդիս լինի քաղաքապետ, ուրեմն գեներալի որդին էլ չպետք է լինի Էջմիածնի քաղաքապետը, Ս. Ալեքսանյանի քրոջ որդին էլ չպետք է լինի համայնքի ղեկավար, կամ Գալուստ Սահակյանի որդին պիտի դուրս գա կառավարությունից:

ՄԵՐ ՄԱՄՈՒԼԸ ԱՂԲ Է ԴԱՐՁԵԼ...

-Պարո'ն. Համբարյան իսկ որպես քաղաքագետ ի՞նչ գնահատական կտայիք իշխանական բուրգի ներսում առկա գզվռտոցներին ու ներկուլիսային ինտրիգներին: Ահավասիկ, դրա վառ օրինակներից մեկն էլ կարծես թե Պաշտպանությա նախարար Սեյրան Օհանյանի ու նրա տիկնոջ դեմ սկսված արշավն է մեդիա դաշտում, ինչն արդեն կարելի է ասել անցնում է թուjլատրելիի սահմանը: Մի քանի օր շարունակ որոշ լրատվականներ թմբկահարում էին այն մասին, թե իբր Սեյրան Օհանյանի կինը նրա քարտուղարուհին է եղել, հետո դարձել տիկինը, հիմա էլ ինչ-որ հարցեր է լուծում ու իրեն զգում ԱՌԱՋԻՆ ՏԻԿԻՆ: Ի՞նչ կասեք սրա վերաբերյալ:

-Մարդիկ սովորական սպասուհուց դառնում են աշխարհահռչակ դերասանուհիներ: Իսկ թե մինչ կինը դառնալը ով է եղել Ռուզաննա Խաչատրյանը, թող ոչ մեկին չհետաքրքրի: Այստեղ այլ հարց է, որ նա հարցեր է լուծում, բայց քանի դեռ չկա հստակ ոչինչ, ես դա չեմ մեկնաբանի: Մեր մամուլը աղբ է դարձել, ամեն ինչ գրում են, ամեն ինչ լուսաբանում են :

Զրույցը` Աննա Առաքելյանի