Սեյրան Օհանյանի դեմ կազմակերպված այս կեղտոտ արշավի ընթացքում մենք համոզվեցինք, որ մեդիադաշտում բարոյական կանոններ չկան...

Պաշտպանության նախարարի դեմ այս օրերին կազմակերպված սև փիար-արշավը հանգեց իր տրամաբանական հանգրվանին՝ դատաքննությանը:
Սեյրան Օհանյանի դեմ կազմակերպված այս կեղտոտ արշավի ընթացքում մենք համոզվեցինք, որ մեդիադաշտում բարոյական կանոններ չկան: Ցանկացած պարկեշտ մարդ կարող է դառնալ մեդիա–ագրեսիայի թիրախի: Բավական է, որպեսզի ձեզ մարդիկ հարգեն, և այս կամ այն կայքում ձեր, ձեր ընտանիքի անդամների հասցեին վիրավորանքներ ու զրպարտանքներ կհայտնվեն: եվ ի՞նչ պետք է անեք այդ դեպքում դուք: Օրենսդրությունը ձեր կյանքում հանկարծակի ի հայտ եկած այդ խնդրի քաղաքակիրթ լուծման հնարավորություն է տալիս: Դուք կարող եք դիմել դատարան: Եթե ձեզ զրպարտել են, եթե հրապարակվածը բացահայտ սուտ է, ապա դուք վախենալու պատճառ չունեք:
Ցանկացած բարոյական մարդ կարդալով այն ամենն ինչ այս օրերին գրվել է պաշտպանության նախարարի ու իր տիկնոջ հասցեյին զզվանք է ապրել: Բոլորն էլ հասկացել են, որ այդ կեղտը պատվիրողները նպատակ ունեն վարկաբեկել Սեյրան Օհանյանին: Բայց մարդկանց հիմարի տեղ դնել չի կարելի:

Մարդիկ հասկանում են, որ եթե վիրավորում են Սեյրան Օհանյանի տիկնոջը, ուրեմն ուրիշ ասելիք չունեն, պաշտպանության նախարարին վարկաբեկող փաստեր չունեն: Իսկ դատարան դիմելու պաշտպանության նախարարի տիկնոջ՝ Ռուզաննա Խաչատրյանի կողմից ղեկավարվող հասարակական կազմակերպության որոշումը մարդկանց մոտ միայն կամրապնդի այն համոզվածությունը, որ վերջին օրերի հրապարակումները զրպարտություն են: Տրամաբանությունը հստակ է՝ դիմում ես դատարան որովհետև քեզ վերագրվածը տեղի չի ունեցել, ու վստահ ես որ կապացուցես դա:
Բայց մի կարևոր հանգամանք էլ կա: Մեր լրագրողական հանրությունն ավելի պատասխանատու պետք է դառնա: Դատարան դիմելու այս հերթական նախադեպը կարող է վերջինիս նպաստել:

Հովո Աղայան