Մայրասպանության մեջ մեղադրվողի նկատմամբ կնշանակվի՞ դատահոգեբուժական և դատահոգեբանական փորձաքննություն

Փաստինֆոն գրում է. Մոր սպանության մեջ մեղադրվող որդու՝ Սամվել Դարբինյանի պաշտպան Անահիտ Եսայանն այսօր միջնորդեց իր պաշտպանյալի նկատմամբ նշանակել դատահոգեբուժական և դատահոգեբանական ստացիոնար համալիր հանձնաժողովային փորձաքննություն:

Պաշտպանը նշեց, որ նախաքննության ընթացքում այսպիսի փորձաքննություն չի նշանակվել, սակայն նկատի ունենալով, որ իր պաշտպանյալը նախաքննության ընթացքում տվել է հակասական ցուցմունքներ, դատաքննության ընթացքում ժխտում է իր առնչությունը դեպքին՝ պաշտպանը գտնում է, որ իր պաշտպանյալի վարքագծում առկա են խուճապային տրամադրություններ, որոնք, հնարավոր է, անմիջապես դեպքի հետ են կապված:

Պաշտպանը գտնում է, որ քրեական գործի լրիվությունն ապահովվելու համար անհրաժեշտ է որպեսզի նշանակվի այս փորձաքննությունը՝ փորձագետներին առաջադրելով հետևյալ հարցերը.
Սամվել Դարբինյանը տառապե՞լ է արդյոք մեղսագրվող արարքի ժամանակ կամ մինչ այդ որևէ հոգեկան հիվանդությամբ, հոգեկան գործունեության ժամանակավոր, խրոնիկ խանգարմամբ, տկարամտությամբ, թուլամտությամբ կամ գտնվե՞լ է արդյոք այլ հիվանդագին վիճակում:

Ներկայումս Սամվել Դարբինյանն ինչպիսի՞ հոգեվիճակում է գտնվում, կարո՞ղ է արդյոք ընկալել քրեական գործի քննության ընթացքը, քննության ընթացքում կարո՞ղ է ընկալել գործի համար կարևոր հանգամանքներ և նրան առաջադրված հարցերին տալ ադեկվատ և ոչ երևակայական պատասխաններ:

Արդյոք տառապե՞լ է որևէ հոգեկան հիվանդությամբ, եթե՝ այո, ապա՝ ինչպիսի՞:

Արդյոք նա գտնվե՞լ է հոգեկան խիստ հուզմունքի, ֆիզիոլոգիական աֆեկտի վիճակում, կամ գտնվե՞լ է արդյոք հոգեկան այնպիսի հուզական վիճակում, որը կարող էր էապես ազդել նրա գիտակցության կամ անգործունեության վրա, թե՝ ոչ:

Ըստ գործի նյութերի՝ ամբաստանյալը չարաշահել է ալկոհոլը, և պաշտպանական կողմը գտում է, որ հնարավոր է ալկոհոլի չարաշահումն ինչ-որ ձևով նրա վարքագծի վրա անդրադարձած լինի:

մանրամասները` սկզբնաղբյուրում