Աբովյանում հունիսի 2-ի դրությամբ նախընտրական քարոզչության վրա գումարներ ծախսել են թեկնածուներից միայն երկուսը

ՀՀ կենտրոնական ընտրական հանձնաժողովն այսօրվա նիստում քննարկել է հունիսի 7-ին Կոտայքի մարզի Աբովյան քաղաքային համայնքում կայանալիք համայնքի ղեկավարի արտահերթ ընտրությունների թեկնածուների նախընտրական հիմնադրամներ կատարված մուծումների և դրանց օգտագործման առաջին հայտարարագրերի վերաբերյալ ԿԸՀ վերահսկիչ-վերստուգիչ ծառայության կազմած տեղեկանքը:

Ինչպես տեղեկացնում է ԿԸՀ մամուլի ծառայությունը, ՀՀ կենտրոնական ընտրական հանձնաժողովը քննարկման արդյունքում նախընտրական քարոզչության ֆինանսավորման կանոնների որևէ խախտում չի արձանագրել:

Հանձնաժողովի համացանցային կայքում տեղադրված տեղեկանքի համաձայն՝ Աբովյանի քաղաքապետի 5 թեկնածուներից հունիսի 2-ի դրությամբ նախընտրական հիմնադրամ բացել են 3-ը՝ ինքնաառաջադրված անկուսակցականներ՝ Ազգային ժողովի Տարածքային կառավարման և տեղական ինքնակառավարման հարցերի մշտական հանձնաժողովի փորձագետ Վահագն Գևորգյանը,

«Չարենցավանի բեռնաուղևորատար ավտոտրանսպորտ» ԲԲԸ գլխավոր տնօրեն Արթուր Հարությունյանը, ով առավել հայտնի է «Պալաչ» մականունով, և ոչ մի տեղ չաշխատող Էդվին Թադևոսյանը: Վերջինիս հիմնադրամում, սակայն, մուտքագրված գումար չկա:

Վահագն Գևորգյանի հիմնադրամում մուտքագրված է 2 մլն 100 հազար դրամ, որից հունիսի 2-ի դրությամբ ծախսվել է 274 հազար 800-ը: Մնացորդը 1 մլն 825 հազար 200 դրամ է:
Արթուր Հարությունյանի հիմնադրամում մուտքագրված է 2 մլն 801 հազար 900 դրամ, որից ծախսվել է 1 մլն 950 հազարը: Մնացորդը՝ 851 հազար 900 դրամ:

Հունիսի 2-ի դրությամբ նախընտրական հիմնադրամներ չեն բացել ոչ մի տեղ չաշխատող, անկուսակցականներ՝ Աբովյանի նախկին քաղաքապետ Կարապետ Իսրայելյանը և Արթուր Հարությունյանը:
Ինչպես «Փաստինֆո»-ն ավելի վաղ հայտնել է, Աբովյանում նախապես ինքնաառաջադրվել էր քաղաքապետի 6 թեկնածու, սակայն սահմանված ժամկետում նրանցից մեկը՝ ոչ տեղ մի չաշխատող Սամվել Հակոբյանը, ինքնաբացարկ է հայտնել:

Ինքաառաջադրված անկուսակցական, Վահագն Գևորգյանը համարվում է Գագիկ Ծառուկյանի թեկնածուն: Նրա թեկնածությունը պաշտպանում են ՀՀԿ-ն և «Բարգավաճ Հայաստան»-ը:

«Չարենցավանի բեռնաուղևորատար ավտոտրանսպորտ» ԲԲԸ գլխավոր տնօրեն Արթուր Հարությունյանը նախապես առաջադրվել էր որպես ՀՀԿ անդամ, սակայն նույն օրն, ավելի ուշ, պարզ էր դարձել, որ Արթուր Հարությունյանը հեռացվել է ՀՀԿ-ից, ինչի մասին որոշումը կայացրել է Կոտայքի տարածքային կազմակերպությունը: Պատճառը կուսակցական կարգապահությունը խախտելն է, մասնավորապես՝ նա չի կատարել վերադաս ղեկավար մարմինների որոշումը:

Բանն այն է, որ ՀՀԿ-ն որոշել է Աբովյանում սատարել Վահագն Գևորգյանին, սակայն Արթուր Հարությունյանը ևս առաջադրել է իր թեկնածությունը:
Հիշեցնենք, որ Աբովյանի քաղաքապետի պաշտոնը թափուր է մնացել այն բանից հետո, երբ նախկին քաղաքապետ, Գագիկ Ծառուկյանի փեսա Կարապետ Գուլոյանը կառավարության որոշմամբ նշանակվեց Կոտայքի մարզպետ: