Զգացմունքներին չեմ տրվելու, չնայած որ հայկական ընտանիքում այլ տեսակետ կա. Սեյրան Օհանյանը կնոջ շուրջ աղմուկի և իր նախագահ դառնալու մասին (տեսանյութ)

Հայաստանի Հանրապետության պաշտպանության նախարար Սեյրան Օհանյանը մեկնաբանել է ԼՂՀ պաշտպանության նախարար Մովսես Հակոբյանի՝ Հայաստան տեղափոխվելու մասին խոսակցությունները: Ազգային ժողովում լրագրողների հետ զրույցում Սեյրան Օհանյանն ընդգծեց, որ նման որոշումները կայացվում են ռազմաքաղաքական մակարդակում: «Այդպիսի որոշումներն ընդունվում են ռազմաքաղաքական մակարդակում, և երբ կլինի այդ որոշումը, մենք կտեղեկացնենք: Ինչո՞ւ ենք ժամանակից շուտ փորձում ինչ-որ հարցեր պարզել»,- նշեց նախարարը:
Լրագրողներից մեկը նախարարից հետաքրքրվեց, թե ինչով է պայմանավորված այն հանգամանքը, որ ԼՂՀ պաշտոնյաները հետագայում տեղափոխվում և բարձր պաշտոններ են զբաղեցնում Հայաստանում՝ բերելով նաև նրա օրինակը, ինչին Սեյրան Օհանյանը պատասխանեց. «Իմ աշխատանքի, ծառայության ընթացքում, սկսած վաշտի հրամանատարի պաշտոնից, ես երբեք որևէ մեկից պաշտոն չեմ խնդրել: Կողքից նկատել են, և ծառայողական աստիճաններով աճը զինվորականի կյանքում հիմնականում իր գործունեության և խրախուսանքի ուղղությունն է: Զինվորական ոլորտում մենք այսօր բարձր պաշտոնների ենք նշանակում նրանց, ովքեր իրենց դրսևորում են որպես բանիմաց զինվորականներ, մասնագետներ, լավ կազմակերպիչներ»:
Պաշտպանության նախարարը նաև անդրադարձել է իր կնոջ հետ կապված աղմկահարույց դեպքին.
«Դրանք բացահայտ հերյուրանքներ են, սուտ է դա: Դիմել ենք համապատասխան ատյաններին, դատախազությանն եք դիմել, գործը կամաց-կամաց բացահայտվում է: Նման իրավիճակում զգացմունքներին չեմ տրվելու, չնայած որ հայկական ընտանիքում այլ տեսակետ կա: Պատերազմի դաշտում էլ սառնասիրտ որոշում եմ ընդունել»: