«Դու կարող ես ամբողջ կյանքում աղքատ մնալ` նույնիսկ եթե մարմինդ մտնի ամենաթանկարժեք հագուստների մեջ…».yerkirmedia.am

Հայաստանի ազգային հերոս, Լաս Վեգասի հայրը, 8-րդ դասարանի կրթությամբ միլիարդատերը, ինքն իրեն միլիարդատեր դարձրած գործարարը. այսպես էին շատերը բնորոշում ամերիկահայ հայտնի միլիարդատեր Քըրք Քըրքորյանին: «Երբ ինքդ ես պատասխանատու քո կայացման հարցում, կյանքում ամեն ինչ շատ ավելի շուտ ես սկսում անել: 9 տարեկան էի, երբ սկսեցի եկամուտ բերել իմ ընտանիք: Նման դեպքում ստանում ես եռանդ, ինչը մի փոքր այլ զգացում է, գուցե ավելի հզոր, քան այն, երբ մեկը ժառանգություն է ստանում». Քըրք Քըրքորյանի թեւավոր խոսքերից մեկն է, ինչը հիմնված է իր կյանքի 98 տարիների ձեռքբերումների վրա. օդային, ավտոշինական ընկերություններ, հոլիվուդյան ստուդիաներ, խաղատներ, հյուրանոցներ, բարեգործական ֆոնդեր, նվիրատվություններ: Նախ բռնցկամարտիկ, հետո օդաչու, ապա գործարար: Գրիգոր Գրիգորյանը ծնվել է Խարբերդից Ֆրեզնո գաղթած Ահարոն Գրիգորյանի ընտանիքում: 9 տարեկանից ստիպված է եղել թերթեր վաճառել, կատարել տարատեսակ աշխատանքներ՝ ընտանիքին օգնելու համար. 8-րդ դասարանում, անախորժություններ ստեղծողի համբավ ձեռք բերելով, նրան հանում են դպրոցից: Քըրք Քըրքորյանը զբաղվում է բռնցքամարտով, այնուհետեւ սովորում օդաչուական դպրոցում՝ դառնալով օդաչու-հրահանգիչ: Որպես ռազմաօդային ուժերի օդաչու, մասնակցում է Երկրորդ համաշխարհային պատերազմին, որի ավարտից հետո, խնայած լինելով իր աշխատավարձի մեծ մասը, զբաղվում է օդանավերի բաժնեթղթերի առեւտրով, ինչպես նաեւ հյուրանոցային բիզնեսով: Նա Լաս Վեգասում կառուցել է աշխարհի 3 ամենախոշոր հյուրանոցները, քաղաքի ամենահայտնի խաղատների սեփականատերն էր:

Բիզնես աշխարհին զարմացրել է նաեւ հռչակավոր մի շարք ընկերություններ մի քանի անգամ գնելով ու վաճառելով: Օրինակ՝ Քըրքորյանը 3 անգամ գնել եւ վաճառել է MGM կինոստուդիան, փորձել է գնել Columbia Pictures-ը եւ գնել է United Artists-ը: Ու չնայած լինելով կինոստուդիայի սեփականատեր, «Ռոյթերս» գործակալության փոխանցմամբ, նա նախընտրում էր հերթ կանգնել՝ կինոթատրոնում ֆիլմի տոմս գնելու համար, քան հաճախել մասնավոր ցուցադրությունների: Համաձայն «Ֆորբս» ամսագրի տվյալների, Քըրք Քըրքորյանը, 4 միլիարդ դոլար կարողությամբ, աշխարհի երկրորդ ամենատարեց միլիարդատերն էր՝ զիջում էր միայն 100-ամյա Դեւիդ Ռոքֆելլերին: Չնայած 2008 թվականին Քըրքորյանի կարողությունը 16 միլիարդ դոլար է եղել: Այնուամենայնիվ, միլիարդատեր գործարարն իր անձնական կարիքների համար երբեք չի շռայլել: Հազվադեպ տված հարցազրույցներից մեկում նա ասել էր. «Դու կարող ես ամբողջ կյանքում աղքատ մնալ` նույնիսկ եթե մարմինդ մտնի ամենաթանկարժեք հագուստների մեջ, տեղաշարժվի ամենաշքեղ մեքենաներով: Հարստությունը միայն նյութական բարեկեցությունը չէ»: Քըրք Քըրքորյանը բարեգործական բազմաթիվ հսկայածավալ ծրագրեր է իրականացրել նաեւ Հայաստանում. Սպիտակի երկրաշարժից հետո եւ շրջափակման տարիներին մեծապես օգնել է Հայաստանին ու Արցախին. դժվար ձմեռներին՝ միլիոնավոր դոլարների նվիրատվություն, իսկ հետագայում՝ միլիոնավոր դոլարներ «ԼինՍի» հիմնադրամի միջոցով՝ Հայաստանում հատկապես ճանապարհաշինության համար: Հիմնադրամի անվանումը նրա երկու դուստրերի՝ Լինդայի եւ Թրեյսիի անունների մասերից է կազմված: 2011 թվականին Քըրքորյանը փակեց «ԼինՄի» հիմնադրամը, իսկ նրանում մնացած 200 միլիոն դոլարը նվիրաբերեց Լոս Անջելեսի Կալիֆոռնիա համալսարանին, ու այն վերանվանվեց «Երազանքի հիմնադրամ»: Ամերիկահայ գործարարը Հայաստան այց կատարել էր 1998 թվականին՝ հանդիպելով դեռ այն ժամանակ երկրի նախագահ Ռոբերտ Քոչարյանին:

Մեր երկրին նրա բարեգործական նվիրատվությունների ընդհանուր գումարն ավելի քան 200 միլիոն դոլար է կազմում: Հայրենիքին մատուցած ծառայությունների համար Քըրքորյանը 2004 թվականին արժանացել է Հայաստանի ազգային հերոսի կոչմանը: Այս տարի հայտնի դարձավ նաեւ, որ Քըրք Քրքորյանը որոշել էր ֆինանսավորել Հայոց ցեղասպանության մասին գեղարվեստական ֆիլմի նկարահանումները: Քըրք Քըրքորյանն ամուսնացած է եղել 3 անգամ, ունի 2 դուստր: 98 տարեկանում կյանքից հեռացած ամերիկահայ գործարարի հարազատների ու ընկերների խոսքով, նա շատերին է հարստացրել՝ առանց որեւէ ակնկալիքների, բարի ու ամաչկոտ մարդ էր: Տարիներ առաջ Քրքորյանի նախկին կանանցից մեկը փորձում էր իր երեխային ներկայացնել որպես Քրքորյանի զավակ: Վերջինս չընդունեց իր հայրությունը, ու ԴՆԹ-ի միջոցով ապացուցեց, որ ինքը չէ երեխայի հայրը, բայց լինելով մեծահոգի մարդ, նա համաձայնեց այդ աղջնակի համար ամսական 100 հազար դոլար ալիմենտ վճարել: