Մոր հասցեին հայհոյանք, դաժան ծեծ, կյանքին սպառնացող դանակահարություն դպրոցականների միջև դպրոցի բակում. 1in.am

Ավան և Նոր Նորք վարչական շրջանների ընդհանուր իրավասության դատարանում Դավիթ Հարությունյանի նախագահությամբ ընթանում է անչափահաս Կարեն Մ.-ի գործի դատական քննությունը:

2000 թվականի մարտի 5-ին ծնված Կարենը դեպքի օրը՝ 2014 թվականի ապրիլի 16-ին, 14 տարեկան էր և սովորում էր 9-րդ դասարանում:

Դեպքը տեղի է ունեցել հենց թիվ 186 դպրոցի բակում:

Դեպքին նախորդող ու դեպքի պատճառ դարձած իրադարձությունները ևս ծավալվել են դպրոցում Կարենի ու նրա համադասարանցի Գեղամի միջև:

Տղաները վիճել են իրար հետ, վիրավորական բառեր են ասել մեկմեկու:

Նույն դասարանում սովորող Արթուրը՝ Գեղամի ընկերը, զանգել է գործով տուժող Հայկին ու մի քանի ընկեր-տղաների, հայտնել է Գեղամին համադասարանցի Կարենի կողմից հասցված «վիրավորանքի» մասին:

Ընկերախումբը հավաքվել է դպրոցի բակում՝ Կարենի «բացատրությունները լսելու»:

Ըստ մեղադրանքի՝ դեպքի օրը, ժամը 14-ն անց 30-ի սահմաններում Գեղամն ու իր ընկերներ Արթուրը, Հայկը, Գագիկը, Կարեն Հ.-ն, Ալբերտը դպրոցի բակում վիճել ու կռվել են անչափահաս Կարեն Մ.-ի հետ: Կռվի ժամանակ Կարեն Մ.-ն դանակի մեկ հարված է հասցրել Հայկ Մ.-ին ու նրա առողջությանը պատճառել է ծանր վնաս՝ կյանքին վտանգ սպառնացող:

14-ամյա Կարեն Մ.-ին մեղադրանք է առաջադրվել դիտավորությամբ տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:

Անչափահաս ամբաստանյալը հանձնվել է ծնողների հսկողությանը:

Դատարանում Կարեն Մ.-ն ընդունել է, որ ինքն է դանակով հարվածել Հայկ Մ.-ին, սակայն առաջադրված մեղադրանքը չի ընդունել՝ հայտնելով, թե ծանր վնասվածք հասցնելու դիտավորությամբ չի հարվածել տուժողին, այլ հարվածել է պաշտպանվելու համար, որովհետև իրեն հետապնդել ու ծեծել են մի մեծ խումբ տղաներ:

Քանի որ անչափահաս ամբաստանյալը չի ընդունում առաջադրված մեղադրանքը, նա կհարցաքննվի դատաքննության վերջում, իսկ դատարանը ունկնդրեց տուժող Հայկ Մ.-ի ցուցմունքը:

Ամբաստանյալից երկու տարով մեծ՝ 1998 թվականի մարտի 12-ին ծնված Հայկը ներկայումս ուսանող է:

Ըստ տուժողի՝ դեպքի օրը՝ դասերից հետո, իրեն զանգահարել է իր ընկեր Արթուրը և ասել է. «Արի դպրոցի հայաթ»:

Հայկն իմացել է, որ Արթուրի ու Գեղամի համադասարանցի Կարենը վիրավորել է Գեղամին: Կարենի հետ այս ընկերախումբը նախկինում էլ «խոսակցություն» ունեցել էր Արթուրի բարեկամուհի մի աղջկա հետ կապված…

Ըստ տուժողի՝ ապրիլի 16-ի դեպքի պատճառը կապված չէր վերը հիշատակված «խոսակցության» հետ:

Դպրոցի բակում հավաքված վեց կամ ավելի քանակությամբ տղաները սպասել են Կարեն Մ.-ին: Վերջինս դուրս է եկել դպրոցից, Արթուրը նրան կանչել է «դպրոցի կողք»՝ խոսելու:

Կարեն Մ.-ն պահանջել է, որ Արթուրն իր հետ «նորմալ» խոսի: Նույնը նա պահանջել է նաև Հայկից:

Վերջինս, իր ցուցմունքի համաձայն, ասել է. «Կարեն ջան, կգա՞ս գնանք դպրոցի կողք, կարող ա իրար չհասկանանք, գոռգոռանք, դասերի վերջ է, ծնողներն էկել են էրեխեքի հետևից, սիրուն բան չի լինի…»:

Կարեն Մ.-ն, ըստ Հայկի, ասել է. «Դու չպիտի ինձ ասես…»:

Մանրամասն` 1in.am