Սպանված կնոջ՝ լսողական խնդիրներ ունեցող սկեսրայրը լսել է հեռախոսով հարսի արած կամացուկ խոստովանությունները

pastinfo.am. 48-ամյա Էդիկն ու կինը վերջին տարիներին անհաշտ են եղել,  անընդհատ վիճել են: Այսպես բնութագրեց որդու և հարսի փոխհարաբերությունները կնոջ սպանության մեջ մեղադրվող Էդիկի հայրը:

Էրեբունի և Նուբարաշեն վարչական շրջանների ընդհանուր իրավասության դատարանում, այսօր շարունակվեց սպանության գործով դատաքննությունը, հարցաքննվեցին 2 վկաները՝  ամբաստանյալի հայրն ու  քույրը:

85-ամյա վկան՝ ամբաստանյալի հայրը, պատմեց, որ որդին ֆինանսական դժվարություններ է ունեցել,  բանկից վարկով 20 000 ԱՄՆ դոլար է վերցրել, սակայն հետագայում չի կարողացել վերադարձնել, քանի որ աշխատանք չի ունեցել: Հայրն էլ վաճառել է իր տունը,  բանկի գումարները փակել, որից հետո էրեբունի թաղամասում տուն են գնել և տեղափոխվել այնտեղ բնակվելու:

Վկան պատմեց, որ սկզբնական շրջանում որդու և նրա կնոջ փոխհարաբերությունները նորմալ են եղել, սակայն վերջին 4 տարիների ընթացքում հարսը փոխվել է,  «չէր սիրում որդուս, նրա կողքը չէր քնում»:

Վկան նշեց, որ որդին և հարսը ամեն օր վիճել են, իսկ իր խրատներին ի պատասխան հարսն իրեն էլ է վիրավորել, ասելով «շան պես մի հաչա», անգամ իրեն հարվածել է:

Տարեց վկան  լսողական խնդիրներ ուներ,  նրան հարցերը ուղղվում էին բղավելով, այդուհանդերձ  պատմեց, որ ինքը 2 անգամ լսել է, թե ինչպես է հարսը շատ կամաց հեռախոսով ինչ-որ մեկին ասում «սիրում եմ,  սիրում եմ քեզ»:

Վկան պատմեց նաև, որ ամեն օր ինքը ցերեկվա ժամերին այգի է գնացել, դեպքի օրը ևս առավոտը նախաճաշել է ու այգի գնացել, բայց երբ ժամը 17.00-ի սահմաններում ետ է վերադարձել, փորձել է  դուռը իր մոտ եղած բալանիով բացել, չի կարողացել:

Հարևաններին է կանչել, փրկարար ծառայությանը և դուռը կոտրելով բացելուց հետո տանը որդուն և կնոջը հայտնաբերել են ընկած վիճակում:

Վկային ներս չեն թողել, սակայն իրեն պատմել են, որ որդին բազկաթոռին նստած է եղել, կրծքավանդակից արյունը «գցում էր», շտապօգնություն են կանչել, և որդուն և նրա կնոջը տարել են:  Կարծել են, թե  որդին մահացել է, հետո ասել են՝ «տղադ շնչում է»:

Մահացած հարսի մասին խոսելով` վկան ասաց, որ նա անպարկեշտ բառերով վիրավորել է իրեն և դստրերին,  բայց ինքը որդուն չի ասել, որպեսզի վիճաբանություն չլինի: «Դուշմանս չտեսներ նրան, ջղայնացած ժամանակ դանակ լիներ ձեռքին, սաղին կփռթեր»:

Տարեց տղամարդը նաև պատմեց, որ դեպքից հետո որդին իրեն ասել է, որ առաջին հարվածը կինն է իրեն հասցրել, դանակը պայուսակի տակից հանել է ու ստամոքսին հարվածել:

Դատավարության մասնակիցների այն հարցերին, թե որդին կնոջը անհավատարմության մեջ կասկածել է, վկան պատասխանեց, որ որդին  ամաչել է ասել, սպասում էր, որ կինը գործից գա, երբ  ուշացած  էր գալիս, ամուսինը նրան հարցնում էր, թե ինչու է ուշացել, կինն  ասում էր՝ «դու իմ մարդը չես, շպիոն ես»:

Ըստ վկայի,  հարսի կողմից հնչեցված այս վիրավորանքներին որդին չի պատասխանել: «Ռիսկ ունե՞ր»,- ասաց նա ու հավելեց, որ երբ դեպքից հետո հիվանդանոց է գնացել որդուն տեսակցության, վերջինս իրեն ասել է, որ  «հեր ջան,  ես ինձ փրկեցի, ինքն առաջինն է հարվածել, թե հետո ինչ է եղել,  չեմ հիշում»:

Տուժողի իրավահաջորդ ճանաչված ամբաստանյալի դուստրը պապի ցուցմունքի ժամանակ մերթընդմերթ մեղադրում էր նրան ստելու մեջ: Նա  հայտարարեց, որ ինչ պապը ասում է,  սովորեցրած է՝ «լարել,  գցել են ստեղ», ծայրից-ծայր սուտ է:

Ամբաստանյալի քույրը՝  Մարիետան, ասաց, որ իր և հարսի փոխհարաբերությունները նորմալ են եղել, սակայն պատմեց, որ եղբոր ընտանիքը անհաշտ է եղել, հաճախակի են վիճել, տարիներ առաջ եղբայրը աշխատանք է ունեցել, լավ պահել է իր ընտանիքը, իսկ վերջին տարիներին աշխատանք չի ունեցել, ճնշված է եղել, իսկ կինը եղբորն անպատիվ խոսքեր է ասել:

Վկան պատմեց, որ եղբոր ընտանիքում տեղի ունեցած վիճաբանություններին մի քանի անգամ անգամ ինքն էլ  ակամայից մասնակից է եղել. երբ վիճել են,  եղբայրը զանգահարել ու կանչել է իրեն: Վկան նաև պատմեց, որ եղբայրն իրեն ասել է, որ կինն ու դուստրն  իրեն ծեծել են:

Ըստ վկայի՝ եղբայրը կնոջն անհավատարմության մեջ է կասկածել, «կարող ա այլ բաներ չէր անում, սակայն խանդի տեսարաններ էր սարքում, իր մարդու ծոցը չէր մտնում, ասում էր՝  զզվում եմ»:

Դեպքից մոտ 20 օր առաջ էլ հերթական վիճաբանությունից հետո հարսը իրերը հավաքել է ու գնացել,  եղբայրը իրենց բաժանությունը շատ ծանր է տարել, չի ցանկացել, որ բաժանվեն:

Դեպքի օրն էլ իրեն զանգահարել են,  գնացել է եղբոր տուն, ըստ նրա նկարագրության, եղբոր  վիճակը եղել է ահավոր,  «ձեռքերը դողում էին, կրծքավանդակից արյուն էր հոսում», քիչ հեռու գետնին պառկած է եղել նրա կինը՝  մահացած վիճակում:

Ըստ վկայի՝ դեպքից հետո եղբայրը քրոջն ասել է, որ կնոջը չի ցանկացել սպանել:

Եղբայրը դանակը հանել է,  դրել սեղանին,  ասել է՝  պատմիր, թե ի՞նչ է եղել, ո՞ւմ հետ է կինն իրեն դավաճանել, ինքը կիմանա ու կբաժանվեն, իսկ կինը դանակը վերցրել է ու ասել՝ «ճանապարհիս մի կանգնի», ապա հարվածել է եղբորը, որից հետո այլ հարվածներ են հաջորդել, եղբայրը կնոջ ձեռքից վերցրել է դանակը:

Նյութն ամբողջությամբ սկզբնաղբյուր կայքում