Ինչ կապ կա այս գործի և Պերմյակովի գործի միջև. Կալանավորվել է Գյումրիում ռուսական ռազմաբազայի սննդի ծառայության պետի նախկին տեղակալ

Դոնի Ռոստովի կայազորային դատարանը Հարավային ռազմական շրջանի  սննդի ծառայության պետի նախկին տեղակալ գնդապետ Դենիս Զորինի նկատմամբ որպես խափանման միջոց ընտրել է կալանքը:

Զորինը մեղադրվում է կազմակերպված խմբի կազմում խաբեության միջոցով Հայաստանի Հանրապետությունում տեղակայված ավիացիոն բազայի կարիքների համար նախատեսված սննդի հափշտակություն կատարելու մեջ: Ինչպես հայտնում է Donday պորտալը, հափշտակության չափը հասնում է 450 միլիոն ռուբլու:

Բազմամիլիոնանոց հափշտակության փաստը ջրի երես դուրս եկավ Գյումրիում Ռուսաստանից զինծառայող Վալերի Պերմյակովի կողմից Ավետիսյանների ընտանիքի սպանության գործի քննության ժամանակ: Այդ ժամանակ քննիչները սարսափեցնող մանրամասներ հայտնաբերեցին: Այդ օրերին հայտնի դարձավ, որ ռուսական ռազմաբազայում ծառայողները հաճախ լքել են զորամասը ուտելիք  փնտրելու համար: Այլ կերպ ասած, նրանք չեն կշտացել:

Այդ ինֆորմացիայի ջրի երես դուրս գալուց հետո` ստեղծվեց ևս մեկ քննչական խումբ, որը սկսեց զբաղվել հափշտակության գործով: Պարզվեց, որ սննդի հափշտակության և այն տարբեր շուկաներում վաճառելու նպատակով գործել է մի ամբողջ ցանց:

Բոլոր հետքերն ի վերջո տարան դեպի Զորինը, ում նկատմամբ էլ կալանքի որոշում է կայացվել:

Նյութի  աղբյուր