«Նորիկիս քավության նոխազ դարձրին.ռազմականի ոստիկանները ծեծ ու ջարդով ստիպում էին, որ իր ա վրա վերցնի մեղքը, ասեցին` մեկա պրիզնատ գաս-չգաս ցմահով ես գնալու, դու մեր ասածը չանե՞ս` դե տես»...

"Իմ որդին Հայկազի հետ ընդհանրապես որեւէ շփում չի ունեցել, ճանաչել է միայն դեմքով, երբ շարք էինք կանգնում: Նորիկիս քավության նոխազ դարձրին` դեպքի հենց առաջին օրը. ռազմականի ոստիկանները ծեծ ու ջարդով ստիպում էին, որ իր ա վրա վերցնի մեղքը, ասեցին` մեկա պրիզնատ գաս-չգաս ցմահով ես գնալու, մենք դաբից ենք լինելու, դու մեր ասածը չանե՞ս` դե տես: Ըտենց էլ արին՝ էրեխուս սարքին մարդասպան, գցին գաղութը: Հիմա էլ բոլոր փորձաքննությունները պատրաստ են, ոչ մի փարձաքննությամբ էրեխիս մեղքը չի ապացուցվել, բայց...(արտասվում է)": Ես էլ եմ ծնող ու հասկանում եմ սպանված տղայի ծնողների ցավը, բայց ճիշտ չի մեղադրել մի էրեխու, ով ընդհանրապես սկի բարեւ էլ չի տվել էդ տղային",- Fnews.am-ի հետ զրույցում անդրադառնալով հունվարի 28-ի գիշերը Ռազմական ինստիտուտում տեղի ունեցած կուրսանտ Հայկազ Բարսեղյանի դաժան սպանության գործով կալանավորվածներից` Նորիկ Սահակյանի մայրը` տիկին Լիաննան:

Թե, որտե՞ղ է եղել Նորիկը դեպքի օրը, ումի՞ց եւ ինչպե՞ս է իմացել կատարվածի մասին կներկայացնենք առաջիկայում:

Հիշեցնենք, որ հունվարի 29-ին՝ ժամը 06:35-ի սահմանում Երեւանում տեղակայված ուսումնական զորամասերից մեկի մարզահրապարակում հայտնաբերվել էր նույն զորամասի 1-ին կուրսի ուսանող Հայկազ Արկադիի Բարսեղյանի դին՝ պտտաձողի վրա պարանով կախված վիճակում: Հարազատները պատմել էին, որ նրան նախ ծեծել են, ապա կախել։ Հիշեցնենք, որ ՊՆ Սեյրան Օհանյանի խոսքով՝ Հայկազի սպանությանը նախորդել է վեճը ծառայակիցների հետ, սպանության համար մեղադրվողները եղել են ալկոհոլի ազդեցության տակ։ Հարազատները կարծում են, որ նման հաշվեհարդարի պատճառն այն է եղել, որ Հայկազը չի ենթարկվել ինտիտուտում 4 ծառայակիցների ստեղծած վախի մթնոլորտին: Դեպքի առթիվ ՀՀ քննչական կոմիտեի զինվորական քննչական գլխավոր վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով: Մեղադրանք է առաջադրվել Հայկազ Բարսեղյանի համածառայակիցներ Վաչե Սահակյանին, Մովսես Ազարյանին, Գնել Թեւոսյանին եւ Նորիկ Սահակյանին, նրանք կալանավորված են:

Նույն դեպքով ՀՀ քննչական կոմիտեի զինվորական քննչական գլխավոր վարչությունում հարուցվել է նոր քրեական գործ` ՀՀ քրեական օրենսգրքի 375-րդ հոդվածի 1-ին մասով (իշխանության անգործությունը, որն էական վնաս է պատճառել), որի շրջանակում փետրվարի 16-ին կալանավորվել է ՀՀ ՊՆ Վազգեն Սարգսյանի անվան ռազմական ինստիտուտի սպա, կապիտան Արտյոմ Ավետիսյանը։

Տաթեւիկ  Աբրահամյան