Հայ կանայք և աղջիկները սեռական թրաֆիքինգի են ենթարկվում Թուրքիայում և Միացյալ Արաբական Էմիրություններում

Հայ կանայք և աղջիկները սեռական թրաֆիքինգի են ենթարկվում Թուրքիայում և Միացյալ Արաբական Էմիրություններում, նշված է «Մարդկանց թրաֆիքինգի մասին» 2014 թ.-ի ԱՄՆ Պետքարտուղարության տարեկան զեկույցում:

Ըստ զեկույցի 2014թ. Հայաստանի դատարանների կողմից թրաֆիքինգ իրականացնելու համար դատապարտվել է 7 հոգի, որից 5-ը սեռական թրաֆիքինգի, 2-ը՝ աշխատանքային թրաֆիքինգի համար (2013թ.՝ 15 հոգի): Պատժաչափերը եղել են 6-ից 11 տարվա ազատազրկում:

Բացի դրանից, զեկույցում նշված է, որ 2014 թ.-ին առաջին անգամ գրանցվեց Հայաստանում Չինաստանից բերված կանանց սեռական թրաֆիքինգի ենթարկելու դեպք: Դեպքի առթիվ 2014 թ.-ի դեկտեմբերի 10-ին հարուցվել էր քրեական գործ՝ ՀՀ քրեական օրենսգրքի 132-րդ հոդվածի 2-րդ մասի 1-ին և 2-րդ կետերով։

Ինչ վերաբերվում է հարկադիր աշխատանքի դեպքերին, զեկույցում նշված է, որ հիմնականում նման դեպքեր գրանցվել են Ռուսաստանում և, ավելի փոքր ծավալով, Թուրքիայում:

Չնայած նշված խնդիներին, այնուամենայնիվ Հայաստանի կառավարությունն ամբողջությամբ բավարարում է թրաֆիքինգի վերացման նվազագույն չափանիշներին:

Այսպես, 2014թ. խորհրդարանն ընդունեց օրենք, որով միօրինականացվեցին թրաֆիքինգի կասկածյալ ու բացահայտված զոհերի նույնականացման, աջակցության, պաշտպանության և վերաինտեգրման ընթացակարգերը հանրապետական ու տեղական ինքնակառավարման մարմինների, հասարակական կազմակերպությունների, միջազգային կազմակերպությունների և քաղաքացիական հասարակության համար: Սակայն դեռևս չկար տուժողների կամ վկաների պաշտպանությա պաշտոնական մեխանիզմ, ինչպես նաև բացահայտվել էին ավելի քիչ թվով զոհեր:

Ոստիկանությունը հաջողությամբ իրականացրել է Հայաստան թրաֆիքինգի ենթարկված օտարերկրացի զոհերի նույնացում և նրանց ուղղորդել դեպի խնամք ապահովող կազմակերպություններ: Կառավարությունը պահպանել է ամուր գործակցային ու աշխատանքային հարաբերությունները հակաթրաֆիքինգային հասարակական կազմակերպությունների, տեղական ԶԼՄ-ների, դոնոր կազմակերպությունների ու տարածաշրջանային գործընկերների հետ: Դատարանների կողմից մարդկանց թրաֆիքինգի համար ավելի քիչ մարդիկ են դատապարտվել: