Դատարանի հետևությունները բավարար չափով փաստարկված ու հիմնավորված չեն. Վերաքննիչ դատարանը բեկանել է արդարացման դատավճիռը

ՀՀ վերաքննիչ քրեական դատարանի կողմից բեկանվելուց հետո նորից Երևանի Աջափնյակի և Դավթաշեն վարչական շրջանների դատարան է վերադարձել կնոջը սպանության սպառնալիք տալու վերաբերյալ գործը, որով նույն դատարանը՝ մեկ այլ կազմով, կայացրել էր արդարացման դատավճիռ:

Ըստ Ն.Կարապետյանին առաջադրված մեղադրանքի՝ նա բարեկեցիկ ապրելու սպասելիքներ է ունեցել կնոջ ընտանիքից և երբ նրա սպասելիքները չեն իրականացել, սկսել է մեղավորությունը փնտրել կնոջ մեջ ու բոլոր անհաջողություններում մեղադրել է նրան և նրա ընտանիքին:

Այդ բոլոր մեղադրանքները ուղեկցվել են հայհոյանքներով, կոպիտ վերաբերմունքով, նաև ծեծով: Տարիների ընթացքում Ն. Կարապետյանը պարտքեր է կուտակել և 2013թ. նոյեմբերին մեկնել է Իսպանիայի Թագավորություն՝ ցանկանալով կնոջն ու երեխաներին նույնպես տանել, սակայն կինը հրաժարվել է մեկնել Իսպանիա:

Նրանք միշտ էլեկտրոնային նամակագրսկսն կապ են պահպանել, սակայն օրեցօր նրանց անձնական փոխհարաբերությունները ավելի են սրվել և վերածվել վեճերի: Հերթական նամակագրության ժամանակ՝ 2014թ. օգոստոսի 6-ին, Նարեկ Կարապետյանը կնոջ հետ ամուսնալուծության, երեխաների խնամակալության հարցերի շուրջ ձևավորված լարված հարաբերությունների ընթացքում Իսպանիայի Թագավորության Բարսելոնա քաղաքից կնոջ էլեկտրոնային հասցեին հաղորդագրություն է հղել՝ «Իսկ երեխա ինձանից խլելու մասին մոռացեք, կսպանեմ յուրաքանչյուրին ով դեմս դուրս գա», որով, ըստ նախաքննական մարմնի, սպանության սպառնալիք է տվել կնոջը, ապա 2014թ. օգոստոսի 27-ին վերադառնալով Հայաստանի Հանրապետություն, այցելել է կնոջ հայրական բնակարանի շենքի բակ և անսպասելի զանգահարել է կնոջը, հաղորդագրություն ուղարկել, որոնցով սպառնալիքն իրականացնելու իրական վտանգ է ստեղծել` կնոջ մոտ առաջացնելով վախի, տագնապի և իր անվտանգության համար անհանգստանալու զգացում։

մանրամասն՝pastinfo.am-ում