Բազմասեր Առաքելյանն իր՝ մարզպետ դառնալու, «գողական աշխարհի» հանդեպ ունեցած իր վերաբերմունքի ու իշխանություն-կրիմինալ սերտ համագործակցության մասին

ԲՀԿ-ից անկախացած պատգամավոր Բազմասեր Առաքելյանը Fnews.am-ի հետ զրույցում՝ արձագանքելով քաղաքական շրջանակներում շրջանառվող այն խոսակցություներին, թե սահմանադրական բարեփոխումներից հետո ԲՀԿ-ն լքած պատգամավորները «Այո»- ի համար լավ աշխատելու դեպքում կարող են «պարգեւների» արժանանանան եւ առաջխաղացում ունենանան, ասաց.

-Հա, բայց ինչ է եղել, որ: Նորմալ ա, վատ ա՞, որ տենց բան լինի: Մենք էլ մեր մարզի, մեր ժողովրդի համար ամեն ինչ կանենք:

-Իսկ մինչ այսօր, նախ եւ առաջ, ի՞նչ եք արել Արագածոտնի մարզի համար: Ասում էին՝ ժամանակին խոստումներ եւ երդումներ էիք տալիս Ձեր ընտրողներին, որ ԲՀԿ-ին ձայն տալու դեպքում, գյուղացիներն իսկապես բարգավաճ Հայաստանում էին ապրելու: Եւ ինչ, ստացվե՞ց:

-Չէ, չէ, պրովոկացիաներ մի արեք, ես ավելի շատ սպորտի մարդ եմ, ու բոլորին էլ փորձում ենք մեր հնարավորության սահմաններում օգտակար լինել:Ինձ, օրինակ, հետաքրքրում էր մեր մարզի մարզակառույցը, որը, փառք Աստծո, եկող տարի հանձնում ենք շահագործման: Իհարկե, այդ ամենը եղավ մեր նախագահի ջանքերի շնորհիվ:

-Այսինքն՝ Դուք Արագածոտնի մարզում ավելի շատ հայտնի եք որպես սպորտսմեն, քան որպես պատգամավո՞ր:

-Չէ, տենց էլ չի. ուղղակի եղածին սպորտը պլյուս ա լինում:

-Իսկ սպորտ պլյուս քաղաքականություն՝ ի՞նչ է ստացվում:

-Դե, ասեցի՝մի քիչ քաղաքական, մի քիչ սպորտային:

-Լավ, կասե՞ք, թե ուր են հասնում Ձեր քաղաքական հավակնությունները: Ասում են՝ մեծ ցանկություն ունեք Սահմանադրական բարեփոխումներից հետո զբաղեցնել Արագածոտնի մարզպետի պաշտոնը:Որքանո՞վ են ճիշտ այդ խոսակցությունները:

-Բա ես չասեցի՞, որ պրովոկացիոն հարցեր ինձ չտաք: Ինձ լավ հարցեր տվեք՝ պատասխանեմ:

-ԲՀԿ նախկին առաջնորդ Գագիկ Ծառուկյանի հետ ի՞նչ հարաբերությունների մեջ եք:
-Շատ լավ, շատ մարդկային:

-Իսկ ի՞նչ հարաբերություններ ունեք նախկին ու ներկա ԲՀԿ-ականների հետ: Ասում են՝ ներկայիս ԲՀԿ-ականներն իրենց «նավը լքածներին» այնքան էլ լավ չեն վերաբերվում մինչ օրս:

-Գիտեք, իմ համար կապ չունի դիմություն-ընդդիմություն, ԲՀԿ, ՀՀԿ գեներալ, եւ այլն: Ես բոլորի հետ էլ շատ նորմալ շփվում եմ:

-Այդ թվում նաեւ քրեական հեղինակությունների: ճի՞շտ է:

-Ինչու չէ, նրանց մեջ էլ շատ լավ մարդիկ կան՝հարգանքի արժանի:

-Փաստորեն, չեք ուզում ՀՀ վարչապետի որդուց ու նրա օգնականից հետ մնալ…

-Մի րոպե, մի րոպե,Դուք նորից պրովոկացիա եք անում, բայց Դուք վտանգավոր եք, հա: Ի՞նչ է նշանակում՝ քրեական հեղինակություն: Բայց ոնց որ Դուք էլ սեր ունեք էդ մարդկանց նկատմամբ, դրա համար եք երեւի էդ թեմաների մասին շատ գրում: Ինչ ա, մարդիկ իրավունք չունե՞ն իրար հետ հարաբերվելու: Այդ աշխարհում էլ շատ կարգին ու շնորհքով մարդիկ կան:

-Միանշանակ: Ես էլ հենց դա եմ ասում, էլի. այդ աշխարհում են բացվում եւ փակվում բոլոր տիպի քաղաքական եւ ոչ քաղաքական նշանակության կարեւորագույն հարցերը: Առիթ չե՞ք ունեցել այդ ամենի կիզակետում գտնվելու: 

-Մարդ ենք չէ՞, բոլորս էլ իրար կարող ենք ճանաչել ու իրար լավ վերաբերվել, դրա մեջ ի՞նչ կա: Էս Դուք արդեն ինձանից խոսք եք քաշո՞ւմ:

-Ամենեւին, ես Ձեր կարծիքն եմ ուզում իմանալ քաղաքական այրեր-կրիմինալ աշխարհ սերտ փոխհարաբերությունների մասին: Փաստորեն, նորմալ եւ օրինաչափ եք համարում, երբ երկրի բարձրագույն իշխանավորների, հատկապես ՀՀ վարչապետի անունը գողական աշխարհի հետ է կապվում:

-Այդ նույն Ձեր ասած գողական աշխարհում, էլի եմ կրկնում, շատ լավ մարդիկ կան: Ես, օրինակ, չեմ մտածում՝ քրեական հեղինակություն, անվտանգության, կամ քաղաքականության հեղինակություն, ինձ համար կարեւորը մարդկային արժեքներն են: Ես բոլորի հետ եմ լավ հարաբերություններ պահում: Ես մեր վարչապետին էլ, մեր բոլոր ղեկավարներին էլ շատ հարգանքով եմ վերաբերում: 

-Ասում են՝ գեներալիտետի հետ էլ եք ջերմ հարաբերություններ պահպանում՝գեներալ Սեյրան Սարոյան, Մանվել Գրիգորյան, եւ այլք: Այդ դեպքո՞ւմ էլ եք մարդկային բարձր հատկանիշներ փնտրում, թե՞ կարեւորը՝ նրանք բարձրագույն իշխանությանը մոտ են կանգնած:

-Ասեմ իմացեք՝ ոչ մեկի հետ չեմ շփվում հարաբերություններ կարգավորելու համար: Ես անձամբ եմ բոլորի հետ կարգավորում իմ հարաբերությունները: Ես ինքս եմ իմ ճանապարհը հարթում, եւ կցանկանայի, որ Դուք էլ եւ մյուս լրատվամիջոցներն էլ նման ասեկոսեներին չընդառաջեիք: Իմ հարցերը միշտ ես եմ լուծում:

-Իսկ Ձեր հորեղբայրը՝ Վահրամ Առաքելյանը, նա էլ Ձեզ չի օգնո՞ւմ բեղուն քաղաքական կարիերա ապահովելու համար:

-Ուրեմն էն մարդը, էն երեխան, ով ճանաչված ու հարգված բարեկամ ունի, բնականաբար նրա հետ կապ ունի: Այո, Վահրամ Առաքելյանն իմ հորեղբայրն է, եւ նա, սենց թե նենց, իմ հետ կապ է ունենալու: Իսկ իմ կարիերայի, իմ առաջխաղացաման հետ, բնականաբար, կապ ունեն իմ հարազատները, ծնողները, իմ շրջապատը, իմ տարածքի ժողովուրդը ու տենց:

-Ի դեպ, ասում են՝ հենց Վահրամ Առաքելյանն է Ձեզ փորձում օգնել Արագածոտնի մարզպետի աթոռին հաստատվելու համար: Ի՞նչ կասեք դրա հետ կապված, եւ Դուք ինքներդ էլ այս պահին ունե՞ք նման ցանկություն, թե՞ ոչ:

-Եկեք Վահրամ Առաքելյանին հանգիստ թողեք. նա հիմա զբաղված մարդ ա, քաղաքականությամբ չի զբաղվում, նա հարգված մարդ ա եւ բուն իր գործով ա զբաղվում:

-Լավ, Դուք Ձեր անունից խոսեք. ուզո՞ւմ եք դառնալ մարզպետ, թե ոչ:

-Էս երկրում որոշողը մեկ մարդ ա. դա երկրի նախագահն է, եթե ինձ ինչ-որ տեղ կտեսնեն, ապա ես փոքր մարդ եմ, որ երկրի նախագահին ու կառավարությանը մերժեմ:

-Իսկ եթե նման որոշում լինի, Դուք կարո՞ղ եք մարզպետի ծանր աշխատանքի բեռը վերցնել Ձեր ուսերին:

-Ես Ձեր ասած էդ կարիերիստ պատգամավորներից չեմ: Ինձ որտեղ որ կտեսնեն՝ ես այնտեղ էլ կլինեմ: Ախր ասացի, չէ՞, Ձեզ, ինձ պրովոկացիոն հարցեր մի տվեք:

-Լավ, եւս մեկ՝ ոչ պրովոկացիոն հարց. ճի՞շտ է, որ ՀՀ վարչապետ Հովիկ Աբրահամյանն էլ է միտքը փոխել (լավ իմաստով)՝ Ձեզ այդ պաշտոնին նշանակելու հարցում, հատկապես որ՝ նա այնքան էլ լավ հարաբերություններ չունի Արագածոտնի ներկայիս մարզպետ Սարգիս Սահակյանի հետ:

-Ուրմեն, ես կոռեկտ կգտնվեմ եւ կպատասախնեմ՝ ես չեմ խառնվում ու չեմ մեկնաբանում Հովիկ Աբրահամյանի որոշումներն ու քայլերը կամ նրա հայտարարությունները:

-Ինչի՞, վախենո՞ւմ եք:

-Ոչ, նման բան չկա, ես հարգում եմ մեր բոլոր ղեկավարներին:

-Ճիշտ եք անում, այ, այդ հարգելու արդյունքում էլ ուզում են Ձեզ մարզպետ դարձնել:

-Գիտեք, էս կյանքում ոչինչ բացառել չի կարելի: Ես էդ տարածքի մարդ եմ, էդտեղից պատգամավոր եմ առաջադրվել, էդ տարածքի համար ահագին բան ունեմ արած: Այնպես որ, ոչինչ բացառել չի կարելի:

-Իսկ ինչպե՞ս եք գնահատում երկրի ներկայիս տնտեսական վիճակը. միայն անկեղծ:

-Գիտեք ինչ, նորաստեղծ երկրում միշտ էլ խնդիրներ շատ են լինում, բայց ես լավատես եմ եւ գտնում եմ, որ մենք կդառնանք կայուն, զարգացած երկիր:

-4,4 տոկոս գրանցած տնտեսական աճո՞վ ենք դառնալու զարգացած երկիր:

-Էլի եմ կրկնում՝ մեզ ժամանակ է պետք մեր ներքին եւ արտաքին խնդիրները կարգավորելու համար: Եւ ես կարծում եմ՝ կգա մի օր, երբ ամեն ինչ իր տեղը կընկնի:

-Հավանաբար, տեղյակ եք, որ ողջ իշխանական էլիտան լծված է «Այո»-ի քարոզարշավին: Կարծիք կա, որ մարդկանց մի ստվար զանգված այդպես էլ տեղյակ չէ` ինչ են սահմանադրական բարեփոխումները, եւ ինչ է փոխվելու իրենց կյանքում այդ բարեփոխումներից հետո: Հետեւաբար, ինչպե՞ս եք կարողանալու Ձեր ընտրողներին համոզել՝ քվեարկել հօգուտ սահմանադրական հանրաքվեի:

-Ես, ինչ պետք է, մարդկանց կասեմ եւ կբացատրեմ: Քարոզարշավը ենթադրում է նաեւ իրազեկում: Քարոզարշավի ընթացքում ինչ կարողացա, այն էլ կանեմ:

-Ուզում եք շատ մեծ խոստումներ չտա՞լ էս գլխից:

-Այ ձեր ցավը տանեմ, օրը կգա՝ ամեն ինչ կտեսնեք, հիմա էսքան պրովոկացիա որ արեցիք, վերջը ո՞նց ա լինելու: Թողեք գնանք մեր գործով զբաղվենք, վստահեք մեզ, ամեն ինչ կանենք մեր ժողովրդի ու մեր երկրի համար:
-Տեսնենք...

Զրույցը՝ Գայանե Զարգարյանի