«Հույս ունեմ, որ դանակը ոսկորին չի հասնի, ինչ որ ձև կգտնեն, որ ազատության մեջ հայտնվեմ».դատապարտյալը ահազանգում է

Ցմահ դատապարտյալը վախենում է արժանանալ նույն ճակատագրին

Դատապարտյալների հիվանդանոցից 23-րդ տարին բանտում գտնվող ցմահ բանտարկյալ, 2-րդ կարգի հաշմանդամ Վահագն Մարուքյանն ահազանգում է, որ առողջական վիճակը վատացել է և այլևս միայնակ չի կարող իր կարիքները հոգալ: Մարուքյանը երկրորդ կարգի հաշմանդամ է, տառապում է հոդերի ընդհանուր սուր բորբոքումով: Տեղեկացնենք, Վանաձորի բնակիչ Վահագն Մարուքյանը կալանավորվել է 1993 թ.-ին՝ 19 տարեկանում: 1994 թ.-ին ՀՀ Գերագույն դատարանի դատավճռով նա դատապարտվել է մահապատժի (2003թ.-ից ՀՀ նախագահի հրամանագրով մահապատիժը փոխարինվել է ցմահ ազատազրկմամբ): Մարուքյանը մեղավոր է ճանաչվել Վանաձորի Ռազմական ոստիկանության պետի դիտավորյալ, կանխամտածված սպանության մեջ:«Ոսկրային համակարգս ամբողջովին փոփոխության է ենթարկվել, ինքնուրույն տեղաշարժվել չեմ կարողանում, ինձ հատուկ խնամք է հարկավոր: Այստեղ անտերության եմ մատնված:

Նստատեղերիս ոսկրերը մաշվում են, այդ հատվածի բորբոքումը 4-րդ աստիճանի է, իսկ ծնկներինս` 3-րդ աստիճանի»,-պատմեց Վահագնը: Նա երեք ամիս առաջ է դիմել վաղաժամկետ ազատման համար, սակայն մերժել են: «Վաղը նորից դիմելու ենք, տեսնենք, այս անգամ ինչպես կարձագանքեն: Կամ պետք է ազատ արձակեն, կամ պետք է վիրահատեն: Վիրահատության համար 10 հազար դոլար են պահանջում,ես այդքան գումար չունեմ»,- Fnews.am-ի հետ զրույցում ասաց Վահագնը՝ հավելելով, որ վախենում է արժանանալ նույն ճակատագրին, ինչ Սողոմոն Քոչարյանը :Մարուքյանը մեզ ասաց, որ բացի Սողոմոն Քոչարյանից մահացել է նաև ցմահ դատապարտյալ Կարեն Բոյաջյանը:

«Գոնե այս անգամ չմերժեն: Ազատ արձակեն կյանքիս վերջին տարիները ընտանիքիս կողքին լինեմ, միայնակ այլևս չեմ կարողանում տեղաշարժվել»,-ասաց ցմահ դատապարտյալը: Հույս ունեմ, որ դանակը ոսկորին չի հասնի, ինչ որ ձև կգտնեն, որ ազատության մեջ հայտնվեմ »,-ասաց դատապարտյալը:

Աննա Մաթեւոսյան