«Սյունիքը լա ՞վ է քվեարկել, Խաչատրյան Սուրիկը ազդել է». ընդդիմությունը չի վստահում Սյունիքի մարզի տեղական հանրաքվեների արդյունքներին

«Այսպես աշխատել հնարավոր չէ»,- դիմելով ԱԺ արտահերթ նիստը վարող՝ ԱԺ փոխնախագահ Էդուարդ Շարմազանովին, ասաց ԱԺ ՀԱԿ խմբակցության պատգամավոր Արամ Մանուկյանը՝ պարզաբանելով. «Արտահերթ նիստի ռեժիմով բերել եք 15 օրենք և 8 պայմանագիր, մարդկային ուժերից վեր է 2 օրվա ընթացքում դրանց վրա աշխատելը»: Արամ Մանուկյանը նշեց նաև, որ այդ պատճառով էլ դահլիճն արդեն կիսադատարկ է:

Էդուարդ Շարմազանովը ցույց տալով «ԱԺ կանոնակարգ» օրենքը՝ հիշեցրեց, որ արտահերթ նիստի օրակարգը հաստատվում է կառավարության որոշմամբ: Ինչ վերաբերում է պատգամավորների դահլիճը լքելուն, ԱԺ փոխնախագահը նշեց, որ պատգամավորներին պարտադրելու իրավասություն ոչ ոք չունի ու ավելացրեց. «Ձեր աշխատասեր խմբակցությունից միայն դուք եք ներկա»:

Իսկ կիսադատարկ դահլիճում ԱԺ-ն շարունակում է քննարկել «Հայաստանի Հանրապետության վարչատարածքային բաժանման մասին» Հայաստանի Հանրապետության 1995 թվականին ընդունված օրենքում փոփոխություններ անելու մասին օրենքի նախագիծը, որով կառավարությունն առաջարկում է Սյունիքի, Տավուշի և Լոռու մարզերի մի շարք համայնքների միավորման արդյունքում առավել արդյունավետ դարձնել դրանց կառավարումն ու ծախսերը:

Ի դեպ, ս.թ. մայիսի 17-ին Լոռու մարզի Թումանյան, Սյունիքի մարզի Տաթեւ, Տավուշի մարզի Դիլիջան համայնքներում արդեն իսկ անցկացվել են տեղական հանրաքվեներ, որոնց արդյունքում գյուղերի բնակիչները կողմ էին քվեարկել խոշորացման գործընթացին: Այս հանրաքվեի արդյունքների հիման վրա էլ կառավարույունը որոշել է շարունակել գործընթացը և համապատասխան օրենսդրական կարգավորումների կատարել:

ՀՀ տարածքային կառավարման եւ արտակարգ իրավիճակների նախարարության կողմից մշակված իրավական ակտերի նախագծերով սահմանվում են նոր ձեւավորվող խոշորացված համայնքների տեղական ինքնակառավարման մարմինների ձեւավորման, դրանց լիազորությունների բաշխման առանձնահատկությունները: Օրինակ` ներդրվելու է «բնակավայրի վարչական ներկայացուցիչ», խոշորացած համայնքներում փոխարինելու է գյուղապետին և նշանակվելու է գյուղապետի ու ավագանու կողմից:

Պատգամավորները կասկածի տակ առան հատկապես Սյունիքի մարզում կայացած տեղական հանրաքվեների արդյունքները` կասկածելով նաև, որ գյուղացիները համաձայնել են միանալ իրենց հարևան գյուղերին, հատկապես, որ դրանք երբեմն մի քանի տասնյակ կիլոմետր հեռու են իրարից:

«Սյունիքը լա ՞վ է քվեարկել, ասենք թե քվեարկել է, Խաչատրյան Սուրիկը ազդել է: Այնտեղ էդ էքսպերիմենտը արեք, Նոյեմբերյանն ու Լոռին հանգիստ թողեք»,- ասաց ՀԱԿ պատգամավոր Արամ Մանուկյանը:

Մանրամասները՝pastinfo.am-ում