Ես երբեք Ծառուկյանի քննադատություններին չեմ մասնակցել, ես նրա կարծիքը հաճախ չեմ էլ կիսել. Արագած Ախոյան

«Այո եւ ոչ» ռեալիթի շոուն աշխատում է իշխանության օգտին: Այս մասին NEWS.am-ի թղթակցի հետ զրույցում նշել է ԲՀԿ խմբակցության պատգամավոր Արագած Ախոյանը՝ հավելելով, որ եթե հրավեր ստանար, մեծ սիրով կմասնակցեր այդ շոուին:

«Ժողովրդի հետ վերջիվերջո մի անգամ տնական նստում են, փափախները ծուռ գցում ճիշտը խոսում են: Շատ անմիջական միջոցառում է, կարծում եմ, որ դրա ընթացքում ավելի շատ ժողովուրդը կշահի»,-NEWS.am-ի թղթակցի հետ զրույցում նշեց պատգամավորն ու ուրախությամբ հավելեց, որ այդ շոուն աշխատում է իշխանության օգտին: «Այս ամեն ինչը աշխատում է իշխանության օգտին, որովհետեւ ժողովուրդն իրազեկվում է: Խնդիրները լիքն են: Մենք շատ լավ գիտենք սոցիալ-տնտեսական խնդիրները, անգիր գիտենք դրա մասին, բայց դրա հետ միասին լավ էլ շփվում են, անմիջական հարցեր են ծնվում, ոչ հարմարավետ վիճակում են հայտնվում եւ իշխանությունը, ու ժողովուրդը, եւ ընդդիմադիրները»,-ընդգծեց նա:

Արագած Ախոյանը նկատեց, որ ընդդիմադիրները չեն կարողանում հիմնավորել, թե ինչու «ոչ» քվեարկել նոր Սահմանադրությանը: Փոխարենը նկատել է, որ ՀՀԿ խմբակցության պատգամավոր Վարդան Այվազյանը հանգամանալից բացատրում է, որ այդ փոփոխությամբ բարելավվում է նաեւ ընդդիմադիր դաշտը:

Դիտարկմանը, թե շատերը նշում են, որ շոուի ընթացքում ակնհայտ է նաեւ, որ քաղաքացիները չեն հավատում իշխանության ներկայացուցիչների վստահեցումներին, Ախոյանը հորդորեց ամեն ինչ չբարդել պետության գլխին. «Ես նեյտրալ մարդ եմ ու այս ամբողջ ներկապնակի մեջ ինձ համարում եմ էն գույներից մեկը, որը իրեն նեյտրալ է պահում: Ես երրորդ տարին է` նեյտրալ եմ ու ասում եմ` իմացեք ամեն անգամ չէ, որ պետք է մեղքը գցել պետության վրա, ես դրանից ուղղակի սարսափում եմ: Եկեք ճիշտը խոսանք, ամեն մարդ իրան պիտի հայելու մեջ նայի, ինչ է, ժողովուրդը մեղք չունի՞: Որտեղ գնում, ասում եմ` մեղքի բաժինը նաեւ ձերն ա, սկսեք այն օրվանից, որ գնում եք ընտրության ու քվեարկում»:

մանրամասն՝այստեղ: