Ապարանցի անասնապահը խլել է ոստիկանի զենքը պատանդ վերցրել նրան ու «ջոջերից» պահանջել ազատել կալանավորված «անմեղ եղբորը»

Վերաքննիչ քրեական դատարանի վարույթում է Սևակ Իսպիրյանի գործով բերված վերաքննիչ բողոքի քննությունը:

Գործը քննվել է Արագածոտնի մարզի ընդհանուր իրավասության դատարանում Սերգեյ Մարաբյանի նախագահությամբ:

Ըստ դատական ակտի՝ 30-ամյա Սևակը ունի մտավոր առողջության խնդիրներ, նա ճանաչվել է սահմանափակ մեղսունակ: Սևակը զբաղվել է անասնապահությամբ:

Ըստ մեղադրանքի՝ 2014 թվականի հոկտեմբերի 22-ին, ժամը 19-ն անց 50-ի սահմաններում Ապարան-Երևան ջրագծի Քուչակի հատվածի ոստիկանության պահպանության ներքո գտնվող պահակետում ծառայական պարտականությունները կատարող ոստիկան, կոչումով սերժանտ Վ. Գևորգյանի վրա Սևակը դանակով հարձակում է կատարել՝ դանակը սեղմել է ոստիկանի որովայնին ու պահանջել է ատրճանակը, բայց հանդիպել է ոստիկանի դիմադրությամը:

Ապա Սևակը քաշքշուկի մեջ է մտել ոստիկանի հետ, վտանգավոր բռնություն գործադրել նրա նկատմամբ՝ նրա մարմնին հասցնելով հարվածներ, հափշտակել է նրա հաշվեցուցակային «Մակարով» ատրճանակը:

Շարունակելով հանցավոր գործողությունները՝ Սևակը հրազեն ուղղել է ոստիկանի վրա, իր մոտ եղած պարանով կապել է ոստիկանի ձեռքերը, նրան տեղափոխել է պահակետ, պառկեցրել է հատակին ու այդ կերպ պատանդ է վերցրել նրան:

Որպես պատանդին ազատելու պայման՝ հարձակման ենթարկված ոստիկան Գևորգյանին օգնության հասած ոստիկան Նավասարդյանի միջոցով Սևակը պահանջել է ոստիկանության Ապարանի բաժնի ղեկավարությունից, որ կալանքից ազատեն ու իր մոտ բերեն եղբորը, ով կալանքի տակ էր տուժողի առողջությանը դիտավորությամբ ծանր վնաս հասցնելու մեղադրանքով հարուցված քրեական գործով:

Սակայն տեսնելով, որ «իր հանցավոր մտադրությունը ձախողվում է, և ոստիկանները շրջապատել են ու կարող են վնասազերծել իրեն», Սևակը տուժող ոստիկան Գևորգյանին թողել է պահակետում ու դիմել է փախուստի:

Ժամեր անց նա հանձնել է հափշտակած «Մակարով» ատրճանակը:

Ամբաստանյալը հայտնել է, թե եղբորը՝ Սամվելին կալանավորել էին մի դեպքով, որով ինքն էր տուժողին հարվածներ հասցրել, բայց բռնել էին իր եղբորը:

Եղբայրը, ըստ Սևակի, դարձել էր «իր զոհը», նրան կալանավորել էին իր փոխարեն, ինչը, իր կարծիքով՝ անարդարացի է: Ինքը բազմիցս դիմել էր իրավապահներին, որ հարցաքննեն ու ճշմարտությունը բացահայտեն, բայց իրեն չէին լսել, անվանել էին «գիժ»:

Մինչ այս դեպքը ինքը բարձրացել էր ոստիկանության Ապարանի բաժնի դիմացի քանդված շենքի կտուր ու ասել էր, թե իրեն կգցի, թող եղբորն ազատ արձակեն, իրեն դատեն:

Եկել էին փրկարարները, իրեն իջեցրել էին, բերել էին եղբորը, ինքը նրան տեսնելուց հետո հանգստացել ու գնացել էր տուն:

մանրամասները՝1-in.am-ում: