Ուրիշ երկրներում անգամ ցունամի է լինում, և մի քանի ամիս անց անգամ հետքը չի մնում, իսկ այսօր ինչ վիճակում է Գյումրին...

ՀՀ-ն՝ 24 տարվա ընթացքում դեռ լավ վարչապետ չի ունեցել...

Ավետիսյանների սպանությունից մինչև ահաբեկչություն, տնտեսական ծանր վիճակից մինչև Սահմանադրության փոփոխություն, «Այո»-ի ու «Ոչ»- ի պայքար … 2015-ը մոտեցավ ավարտին, իսկ մեզ մնում է միայն ամփոփել այն:

Fnews.am-իհետ զրույցում քաղաքագետ Գագիկ Համբարյանը, նախ եւ առաջ խոսելով կարեւորի՝ անցնող տարվա տնտեսական ցուցանիշների մասին նշեց.«2015-ին մենք որպես այդպիսին տնտեսական աճ չունեցանք, կառավարությունն արդեն որերորդ տարին է,  ինչ-որ աճ է խոստանում, բայց հասարակությունն այդ աճն իր վրա բացարձակ չի զգում:

Կառավարությունը թվեր է հրապարակում, որն ինձ բոլորովին չի հետաքրքրում, քանզի մեր կառավարությունն այնքան անկապ է, որ ֆինանսների նախարարը մեկ այլ բան է ասում, վարչապետը ` մեկ այլ բան: Պայմանավորվեին՝ խայտառակություն չլիներ հասարակության առաջ: Ես կասեմ միայն, որ ՀՀ-ն 24 տարվա ընթացքում դեռ լավ վարչապետ չի ունեցել և դա փաստ է: Եթե ՀՀ-ն լավ վարչապետ ունենար, աղետի գոտին չէր մնա աղետի գոտի՝ այսքան տարի անց: Ուրիշ երկրներում անգամ ցունամի է լինում՝ մի քանի ամիս անց անգամ հետքը չի մնում, իսկ այսօր ինչ վիճակում է Գյումրին՝ երկրաշարժից 27 տարի անց: Անգամ այսօր Գյումրիում 4000 ընտանիք դեռ ապրում է վագոն-տնակներում, էլ ինչ լավ վարչապետի մասին է խոսքը: Պարզվում է , որ մեզ մոտ մինիմալ աշխատավարձը չի բավարարում անգամ մթերքների ամսեկան որոշակի ծավալին: 2016-ին էլ, կարծում եմ ոչ մի լավ արդյունք չի կարելի սպասել, քանի որ մենք չունենք բյուջե: Ծայրահեղ վատ է մեր սոցիալ-տնտեսական վիճակը: 

Սակայն վերջում ուզում եմ ավելացնել, որ այս ամենից զատ, միևնույնն է, ես դեռ հույս ունեմ, որ շատ բաներ կփոխվեն և ամեն ինչ մեր ձեռքերում է:

Ինչ վերաբերում է քաղաքական դաշտի անցուդարձին, ապա պետք է նշեմ , որ այն լճացած է. մենք տարվա սկզբից ականատես եղանք սկանդալային երևույթների: Օրինակ, երբ փետրվարի 12-ին նախագահը իր ելույթով ապտակ հասցրեց ԲՀԿ-ին և քաղաքական դաշտից դուրս մղեց Գագիկ Ծառուկյանին: 

Առհասարակ, տարին մեզ համար սկսվեց ողբերգությամբ, շատ վատ տարի էր Գյումրու համար, քանի որ հենց 2015-ի հունվարին տեղի ունեցավ Ավետիսյանների սպանդը, որը բավականին մեծ արձագանք ունեցավ թե ՀՀ-ում, թե ՀՀ-ից դուրս, ինչից ցանկացան օգտվել բոլոր շահագրգիռ կողմերը» :

Խոսելով սահմանային լարվածության ուարտաքին քաղաքական ազդակների մասին, քաղաքագետը նշեց. «Միջազգային առումով ևս՝ դրական տեղաշարժեր չունեցանք: Իրավիճակը հայ-ադրբեջանական սահմանին բավականին լարված էր ողջ տարի, այս տարի առաջին անգամ ` զինադադարի կնքումից հետո, արդեն դեկտեմբերի սկզբին, ադրբեջանցիները սկսեցին օգտագործել տանկեր, որը նշանակում է, որ Ադրբեջանը դանդաղ ընթացող պատերազմ է սկսում: Ցավոք սրտի 2015-ին գրեթե ամեն ամիս ունեցանք զոհեր, և ինչքան էլ որ պատժեցինք Ադրբեջանին, ամեն դեպքում մեզ համար ամեն զինվորի կյանք անգնահատելի է »:
Հարցին, թե արդյո՞ք կարելի է հուսալ, որ 2016-ը ավելի լավ տարի կլինի, քաղաքագետը պատասխանեց. «Հասարակության համար ամենավատ անակնկալը պատրաստել էին տարվա վերջին : Այդ անակնկալը հիասթափեցրեց բոլոր նրանց, ովքեր ինչ-որ հույս ունեին 2016-ի հետ կապված: 2015-ի վերջում ասվեց, որ 2016-ին չի սպասվում աշխատավարձերի, թոշակների բարձրացում, բայց ականատես եղան , որ ապրանքների գները օր օրի աճում են»: 

Անդրադառնալով էլեկտրաէներգիայի թանկացման մասին, քաղաքագետը նշեց. «Մեր հասարակությունը տարավ փայլուն հաղթանակ : Ես չեմ պատկերացնում մեկին մեր երկրում, անգամ ՀՀ նախագահ Սերժ Սարգսյանին, որ կողմ լինի էլեկտրաէներիգիայի թանկացմանը:
Դիտարկմանը, թե ի՞նչ պայմաններում անցավ Սահմանադրական փոփոխությունների Հանրաքվեն, քաղաքագետը պատասխանեց . «Ես վստահ եմ, որ բոլորը, այդ թվում և մեր իշխանությունը, լավ պատկերացնում են, թե ԱՅՈ-ն ինչպես անցավ: Ցավալին այն է , որ ԱՅՈ-ի համար պայքարում էին անկիրթ, անլվա, անթրաշ թաղային թափթփուկները, որոնց համար կարևորը շենքերի բակում պպզելն ու արևածաղիկ ուտելն է : Հենց այս մասսան անցկացրեց ԱՅՈ-ն : Ցավալի է , որ մենք այ այսպիսի հանրաքվեներ ենք անցկացնում: Ողբերգական է նաեւ այն, որ շատերն էլ պայքարելու փոխարեն ` թողնում-հեռանում են Հայաստանի Հանրապետությունից: Արտագաղթը մեծ խնդիր է ներկայացնում իրենից»:

Պատրաստեց՝ Ա. Առաքելյանը