«Ամուսնու կողմից կնոջ նկատմամբ ընտանեկան բռնության 471 մեկ դեպք է գրանցվել, նախորդ տարի՝ 410, կնոջ կողմից ամուսնու նկատմամբ 15 դեպք է գրանցվել»

Ոստիկանության քրեական հետախուզության գլխավոր վարչության 3-րդ վարչության պետ, ոստիկանության գնդապետ Նելլի Դուրյանը, այսօր լրագրողների հետ հանդիպման ժամանակ տեղեկացրեց, որ 2015-ին Հայաստանում երեխաների թրաֆիքինգի երկու դեպք է գրանցվել:«Նման երեխաների թիվը մեծ չէ, յուրաքանչյուրի հարցն օպերատիվ քննարկվում է»:
Վերջինս անդրադառնալով ընտանեկան բռնությանը նշեց, որ թեև չկա ընտանեկան բռնության վերաբերյալ օրենք, սակայն դեռևս 2013 թվականին Ընտանեկան բռնության վարչություն է ստեղծվել, և որոշակի առաջընթաց նկատվել է:

«Ունենք հստակ վիճակագրություն, որը հնարավորություն է տալիս նպատակաուղղված միջոցառումներ կազմակերպել, վերլուծել իրավիճակը, ներկայացնել շահագրգիռ մարմիններին»,-ասաց նա: 

Դուրյանը նշեց, որ թեև վիճակագրությունը ցույց է տալիս, որ ընտանեկան բռնության աճ է գրանցվել, սակայն դա պայմանավորված չէ այն պատճառով, որ դեպքերն են շատացել, այլ այն պատճառներով, որ ազգաբնակչությունը տեղեկացված է վարչության մասին, ոստիկանության նկատմամբ վստահությունը բարձրացել է, քաղաքացիների իրավագիտակցությունն է բարձրացել, ինչպես նաև քարոզչական արշավն է իր ազդեցություն ունենում, որտեղ շատ կարևոր է հասարակական սեկտորի աշխատանքը:

Նա հայտնեց, որ ընտանեկան բռնության զոհ են դառնում նաև տղամարդիկ: «2015 թվականին գրանցվել է ընտանեկան բռնության 784 դեպք, որից 150-ով քրեական գործեր են հարուցվել, իսկ 2014 թվականին դեպքերի քանակը եղել են 678, որից հարուցվել են 76 քրեական գործ»:

«Ամուսնու կողմից կնոջ նկատմամբ ընտանեկան բռնության 471 մեկ դեպք է գրանցվել, նախորդ տարի՝ 410, կնոջ կողմից ամուսնու նկատմամբ 15 դեպք է գրանցվել, նախորդ տարի՝ 6-ը: Ծնողի կողմից զավակի նկատմամբ 65 դեպք, նախորդ տարի՝ 62, զավակի կողմից ծնողի նկատմամբ՝ 106 դեպք է գրանցվել, նույնքան էլ նախորդ տարի»,-ասաց նա: