«Աղջիկ ջան, քրեական աշխարհի հեղինակությունների հետ դուք ավելի շատ եք շփվում, քան ես».Վարդան Ղուկասյան
2016 թ-ի սեպտեմբերին Գյումրիում անցկացվելիք քաղաքապետի ընտրություննները, արդեն իսկ մեծ «աժիոտաժ» են ստեղծել հայրաքաղաք Գյումրիում:
Եւ ինչպես նշել էր գյումրեցի քաղաքագետ Գագիկ Համբարյանը այս պահի դրությամբ հավանական թեկնածուները երեքն են՝ գործող քաղաքապետ Սամվել Բալասանյանը, նախկին քաղաքապետ Վարդան Ղուկասյանը և մեծամասնական ընտրակարգով պատգամավոր դարձած, նախկին ԲՀԿ-ական Մարտուն Գրիգորյանը:
Քաղաքագետ Համբարյանը նշել էր նաեւ, որ ՏԻՄ ընտրությունները տարբերվում են համապետական ընտրություններից, և շատ կարևոր է, թե որ թեկնածուն ինչ վարկանիշ ունի Գյումրիում և ինչ է արել Գյումրիի համար։
Ի դեպ, այս օրերին արդեն իսկ ակտիվ խոսակցություններ են շրջանառվում այն մասին, որ Գյումրվա նախկին քաղաքապետ Վարդան Ղուկասյանը՝ նույն ինքը Վարդանիկը, իր թիմակիցների, այդ թվում նաեւ քրեական աշխարհի ներկայացուցիչների հետ սկսել է առավել հաճախակի հանդիպումներ ու քննարկումներ ունենալ, ովքեր հայտնի է, որ ընտրական գործընթացների ժամանակ որոշիչ դերակատարություն են ունենում:
Այս եւ այլ հարցերի շուրջ մեկնաբանություն ստանալու համար,Fnews.am-ը հարցադրում արեց Գյումրվա նախկին քաղաքապետ Վարդան Ղուկասյանին:
-Պարոն Ղուկասյան, ճի՞շտ է, որ կրկին ուզում եք Գյումրու քաղաքապետ դառնալ:
-Ժամը ութն է, տուն չես գնացե՞լ աղջիկ ջան: Այս պահին՝ հենց այս պահին, որ քեզ հետ խոսում եմ, այդպիսի բան չկա:
-Այսինքն, հետո կարող է մտքափոխվե՞ք:
-Ես արդեն ասեցի. հիմա չեմ զբաղվում, ես հիմա տենց ցանկություններ չունեմ:Բայց մի հատ խոսք էլ կա չէ.«Ասում են երբեք, մի ասա երբեք:Էդքան բան: Ուրիշ հարց կա՞»:
-Իսկ ի՞նչ կասեք այն լուրերի վերաբերյալ, որ Ձեր առանձնատունը շարունակում է գյումրեցիների համար որպես «քաղաքապետարանի» ծառայել ...
-Ընդհանրապես Ձեր ինչ գործն է, ինչ բաներ ենք ուզում անել, չեմ հասկանում: Մենք փոքրուց էլ բոլորին օգնել ենք: Որ մեռենեմ էլ՝ ինձ պըտի դիմեն, բա ո՞ւմ դիմեն, ես տենց մարդկանց սատարող մարդ եմ: Ուրի՞շ:
-Ուրիշ, ուզում էի իմանալ վերջին ժամանակներս խոշոր տրամաչափի ՀՀԿ-ականների հետ ի՞նչ տեսակ շփումներ եք ունեցել:
-Ես քաղաքականությամբ չեմ զբաղվում, եւ որեւէ մեկի հետ չեմ շփվում:
-Այդ թվում նաեւ քրեական հեղինակությունների՞...Ասում են, որ Ձեր հարաբերությունները այդ աշխարհի հետ բավականին ջերմ են:
-Աղջիկ ջան, քրեական աշխարհի, եւ բոլոր աշխարհների հետ դուք ավելի շատ եք շփվում, քան ես: