Արսեն Բաբայան. «Կազմակերպության նախագահը նույն անձն է, որն ի պաշտպանություն իրեն տարածում է կեղծ տեղեկություններ»

Հաշվի առնելով իմ գործունեության շուրջ վերջին օրերին տարածվող կեղծ լուրերը, նկատի առնելով որոշ անբարեխիղճ անձանց կողմից լրատվամիջոցներին մոլորեցնելու փորձերը, դրանց զոհ դառնալու որոշ դեպքերը (օրինակ՝ Aravot.am) ստիպված եմ որոշ պարզաբանումներ տալ։

Այսպես, Xnews.am լրատվական կայքի ներկայացուցիչների հավատարմագրումը մերժվել է՝ հիմք ընդունելով ՀՀ ԱԺ-ում լրագրողների հավատարմագրման կարգի համապատասխան դրույթը, ըստ որի՝ հավատարմագրման համար լրատվամիջոցը պետք է ներկայացնի իրավաբանական անձի տվյալները։ Նշված լրատվամիջոցի դիմումը ստորագրված է եղել անհատ ձեռներեցի անվամբ, ինչը նշանակում է, որ լրատվական կայքի պատկանելիության հարցը փաստվել է դիմողի կողմից։ Նշված հանգամանքը դուրս է ձևական սխալի (թերություն) շրջանակից, ուստի չէր կարող շտկման համար տեղեկացման կամ ժամանակ տրամադրելու հիմք հանդիսանար։

Այսինքն, խելամտության կանխավարկածը հուշում է, որ բանականության սահմաններից դուրս է, որ դիմողը կկեղծեր կայքի պատկանելիության փաստը և որևէ իրավաբանական անձի անունով կամ կնիքով կեղծ դիմում կներկայացներ։ Դիմողն իր հրապարակումներում դժգոհություն է հայտնում, որ, փաստորեն, իրեն կեղծելու հնարավորություն չի տրվել։

Զուգահեռ այս ամենին «Լրագրողների միավորում» հասարակական կազմակերպության անվամբ տարածվել է նույնաբովանդակ, փաստերը խեղաթյուրող տեքստ։ Հարկ եմ համարում տեղեկացնել, որ նշված կազմակերպության նախագահը նույն անձն է, որն ի պաշտպանություն իրեն տարածում է կեղծ տեղեկություններ։

Սույն անձը (դիմող) նաև տարածում է զրպարտչական լուրեր, թե իբր ես հավատարմագրել եմ ոչ իրավաբանական անձ հանդիսացող լրատվամիջոցներ, ինչն ակնհայտ սուտ է։ Խոստացել է թվարկել այդպիսի լրատվամիջոցների անուններ. մինչ օրս սպասում եմ։

Իր կողմից նաև դիմում է ներկայացվել ՀՀ ԱԺ նախագահին, որի պատասխանն օրենքով նախատեսված ժամկետներում (1 ամիս) կուղարկվի։

Հավատարմագրումը մերժելու որոշումները բացի այն, որ էլ. ստորագրությամբ տրամադրվել են դիմողին, նաև փոստով ուղարկվել է դրանց թղթային տարբերակները։

Կարծում եմ, որ այսուհետ հարգված կամ գոնե լսված լրատվամիջոցներն ավելի ուշադիր կլինեն, և նույն անձին պատկանող տարբեր միավորումների անունից տարածվող անհեթեթ տեղեկությունները նախ կստուգեն, քանի որ շահերի բախումն ակնհայտ է։

Արսեն ԲԱԲԱՅԱՆ

Ազգային ժողովի Հասարակայնության և տեղեկատվության միջոցների հետ կապերի վարչության պետ