Հարբած վիճակում Երանոսյանների բնակարան այցելած ռուս զինծառայողի արարքներում հանցագործության հատկանիշներ չեն հայտնաբերվել

Ինչպես հայտնի է, հունվարի 31-ի գիշերը՝ ժամը 23:30 սահմաններում, Գյումրու Անի թաղամասի 13 շենքի 116 բնակարան է ներկայացել զինվորական համազգեստով ՌԴ ռազմաբազայի զինծառայող  ու պարտադրել բնակարանում ապրող բնակիչներին, որ բացեն տան դուռը: Ինչպես ավելի վաղ ԳԱԼԱ-ի հետ զրույցում պատմել է տանտիրուհի Ռուզաննա Երանոսյանը, զինծառայողը հարբած է եղել ու անընդհատ գոռացել՝ բացեք դուռը:

Ընտանիքի անդամները զանգահարել են ոստիկանություն, նշված հասցե այցելած ոստիկանները հարբած զինծառայողին հեռացրել են տարածքից:

Րաֆֆի Ասլանյան

Սույն գործով ներկայումս շարունակվում է նյութերի նախապատրաստման գործընթացը: Դեպքին հաջորդած 10 օրերի ընթացքում որոշում է կայացվելու, թե կատարվածի առթիվ քրեական գործ հարուցվելու է, թե ոչ:  Ներկայումս, ըստ Շիրակի մարզի դատախազ Րաֆֆի Ասլանյանի, գործի նյութերում չկա որեւէ փաստական տվյալ, որը քրեական գործ հարուցելու համար հիմք կհանդիսանա: Միակ վարկածը շարունակում է մնալ այն, որ ռազմաբազայի պայմանագրային զինծառայողը շփոթել է բնակարանը: «Նյութերի նախապատրաստման 10-օրյա ժամկետում պետք է կայացվի որոշում, կամ պետք է հարուցվի քրեական գործ, եթե որեւէ փաստական տվյալ կլինի հանցագործության մասին, իսկ եթե չի լինի, այդ դեպքում նյութերով քրեական գործի հարուցումը կմերժվի անձի արարքում հանցակազմի բացակայության հիմքով»,- ասաց Րաֆֆի Ասլանյանը:

Ավելին`galatv.am/hy/news