10 Փետրվար, 2016

Շուշանիկ Բախշյանն աշխատանքի չի գնում սեփական նախաձեռնությամբ. ումի՞ց և ինչի՞ց են բողոքում հղի կանայք

«Շենգավիթ» ԲԿ-ն բժշկուհի Շուշանիկ Բախշյանի հետ աշխատանքային պայմանագիրը չի խզել: Այս մասին «Փաստինֆո»-ի հարցին ի պատասխան հայտնեցին «Շենգավիթ» ԲԿ-ից:

Հիշեցնենք՝ ծննդկան Մերի Մարգարյանի մահվան համար մեղադրվող բժշկուհին քրեական հետապնդման ենթարկվելուց ի վեր աշխատանքի չի գնացել: Համենայնդեպս, այդպես նշված է նրա փաստաբանի կողմից տարածված հայտարարության մեջ։

Եվ, ինչպես պարզվում է, նա աշխատանքի չի գնում սեփական կամքով ու նախաձեռնությամբ, քանի որ նախաքննական մարմինը ևս բժշկուհու մասնագիտական գործունեությունը կասեցնելու միջնորդությամբ բժշկական կենտրոնի ղեկավարությանը չի դիմել։

Բայց հղի կնոջ մահվան համար մեղադրվող բժշկին յուրօրինակ աջակցություն են որոշել հայտնել նրա ավելի քան 200 հիվանդներ ու հղի կանայք: Նրանք դիմում են ուղարկել Գլխավոր դատախազություն և Քննչական կոմիտե` պահանջելով դադարեցնել նրա նկատմամբ քրեական հետապնդումը, քանի որ դա իրենց «ծանր հոգեկան ապրումներ» է պատճառում:

Պարզվում է՝ այս կանայք «սարսափով լի աչքերով օրերով սպասում են բժշկուհու վերադարձին` նրան կրկին տեսնելու և հենց նրանից բժշկական օգնություն ստանալու ակնկալիքով»:

Հետաքրքրական է, թե ինչու է բժշկուհին անտեսում ու արհամարհում իր հիվանդների այդ թախանձագին խնդրանքը և չի ցանկանում ընդունել ու բուժօգնություն ցույց տալ նրանց: Բժշկուհին ուղղակի գերադասում է աշխատանքի չգնալ՝ թերևս չմտահոգվելով իր կարիքն ունեցող այդ կանանց առողջական ու հոգեկան վիճակի համար:

Մանրամասն` http://www.pastinfo.am/hy/node/90342