Սահմանապահները դատարանում նշել են, որ Պերմյակովին ձերբակալել են որպես հետախուզվողի, ոչ թե սահմանախախտի

Գյումրիում տեղակայված ռուսական 102-րդ ռազմաբազայի տարածքում շարունակվեց Ավետիսյանների ընտանիքի յոթ անդամների սպանության մեջ մեղադրվող Վալերի Պերմյակովի գործով դատական նիստը: Դատարանում հարցաքննվող առաջին վկան Երազգավորսի բնակիչ Միքայել Խլղաթյանն էր: «Արմենպրես»-ի հաղորդմամբ` վկան պատմեց, որ հունվարի 12-ի գիշերը մեքենայով անցել է հայ-թուրքական սահմանի մոտով և հեռվից նկատել ինչ-որ անձի, լսվել են կրակոցներ: Մտածել է, թե որսորդներն են ու հեռացել է: Փաստաբանները վերջինիս հարցեր ուղղեցին նրա նախաքննական ցուցմունքի մասին, որի մեջ նա գրել էր, որ մոտեցել է սահմանի մոտ կանգնած «Վիլիս» մակնիշի մեքենային, որով տեղափոխելու էին Պերմյակովին և հետաքրքրվել է Պերմյակովի մասին: Վկան նշեց, որ դա եղել է մեկ տարի առաջ և ինքը չի հիշում, թե ինչ է գրել: Իրարամերժ տեղեկություններ կային նաև սահմանապահ ջոկատի վարորդի ցուցմունքների մեջ: Վարորդին ուղղված այն հարցին, թե` ինչու են իրենք ուղեկալի մոտ գնացել սովորական, իսկ Պերմյակովին տեղափոխելու ժամանակ զարտուղի ճանապարհով, վարորդը Մամիկոն Հարությունյանը նշեց, որ չի կարող ասել, քանի որ հրահանգ է կատարել: Վկային նաև հարց ուղղեցին, թե մեքենայի մեջ Պերմյակովին սահմանապահ ջոկատի հրամանատարի և նրա տեղակալի կողմից ինչ հարցեր են ուղղվել: Վարորդը նշեց, որ ինքը միայն լսել է, որ հարցրել են, թե արդյոք ինքն է ռազմաբազան լքած զինվորը և ուր է զենքը: Այլ հարցեր Մամիկոն Հարությունյանը չի լսել: Հարցաքննվեց նաև սահմանապահ ջոկատի հրամանատարի տեղակալ, պետական սահմանի պաշտպանության բաժանմունքի պետ Դավիթ Միրզոյանը: Վերջինս նշեց, որ դեպքի մասին իմանալուն պես հրահանգել է իրականացնել սահմանի շուրջօրյա հսկողություն: Փաստաբանների այն հարցին, թե իրենք քանի ժամ իրավունք ունեն ձերբակալված անձին պահել իրենց մոտ, վկան նշեց, որ եթե անձը չճշտված մարդ է, ապա իրենք իրավունք ունեն պահելու նրան երեք ժամ, որից հետո պետք է փոխանցել կամ ոստիկանությանը կամ ԱԱԾ-ին կամ էլ հետախուզում հայտարարողին: Վկան նաև նշեց, որ Պերմյակովին ձերբակալել են որպես հետախուզվողի, այլ ոչ թե հայ-թուրքական սահմանը խախտողի: Մեկ այլ կարևոր հանգամանք, որը նշեց Միրզոյանը. Պերմյակովի փոխանցման ակտը ստորագրել են 102-րդ ռազմաբազայի այդ ժամանակվա հրամանատար Անդրեյ Ռուզինսկին ու ռուսական սահմանապահ զորքերի Բայանդուրի տեղամասի սահմանապահ ջոկատի հրամանատարի տեղակալ, գնդապետ Սերգեյ Մերզլիկինը` հայ ոստիկանների ներկայությամբ: