«Կարիք չկա հրահրել ու կռիվ գցել.մենք որեւէ մեկի հետ խնդիր չունենք»,-ասում է ՖԱՌ-ի՝ Արթուր Սարգսյանի եղբայրը

Մամուլը դեռեւս շարունակում է ահազանգել այն մասին, որ ազատամարտիկ Հեբո Խչեյանի որդու՝ Արման Խչեյանի հետ տեղի ունեցած միջադեպի կրակը այսպես ասած չի մարում:

Հիշեցնենք, որ դարձյալ մամուլում տեղ գտած հրապարակումների համաձայն, մարտի 12-ին եւ 13-ին անհանգիստ վիճակ է եղել Գեղարքունիքի մարզի Վարդենիս քաղաքում: Վարդենիս-Երեւան երթուղին սպասարկող միկրոավտոբուսների աշխատանքը դադարեցվել էր այն պատճառով, որ երթուղին սպասարկող ընկերության սեփականատիրոջ թիկնապահները ծեծի են ենթարկել քաղաքում ճանաչված ազատամարտիկ Հեբո Խչեյանի որդուն՝ Արմանին:

Ծեծից հետո Խչեյանները եւ ԵԿՄ Վարդենիսի մասնաճյուղի անդամները փակել էին Վարդենիս-Երեւան ավտոճանապարհը՝ խոչընդոտելով երթեւեկությանը: Ըստ շրջանառվող տեղեկությունների՝ ազատամարտիկի որդուն ծեծի էին ենթարկել քերական աշխարհում հայտնի Արթուր Սարգսյանի (Ֆառ) մականունով թիկանապահները: 
Սակայն, ազատամարտիկ Հեբո Խչեյանի որդի՝ Արման Խչեյանը արդեն իսկ հրապարակավ ասել է, որ ինքը որեւէ մեկի հետ հարց ու պատասախան չունի, եւ որ այդ թեման այլեւս փակված է համարում: Իսկ այն հարցին էլ, թե Վարդենիսում խոսվում է, որ Խչեյանին ծեծի ենթարկողները եղել են քրեական հեղինակություն «Ֆառ»-ի թիկնապահները, վերջինս պատասախանել է, թե «Ես իրեն չեմ էլ ճանաչում, չեմ էլ տեսել: Ես լսել եմ, որ ինքը Վարդենիս-Երեւան երթուղին սպասարկող ընկերության տերն ա, բայց թե ով է ինքը, ինչ է, ես չգիտեմ»:

Պարզելու համար, թե ի վերջո, ո՞ւր է հասնում այս պատմության թնջուկը, Fnews.am-ը փորձեց պարզաբանումներ ստանալ նաեւ Արթուր Սարգսյանից՝ նույն «ՖԱՌ»-ից, սակայն նրա փոխարեն մենք կարողացանք կապ հաստատել վերջինիս եղբոր՝ Ավիկ Սարգսյանի հետ, ով նախ տեղեկացրեց, որ իր եղբայրը արդեն բավականին երկար ժամանակ բուժման նպատակով գտնվում է արտերկրում, եւ որ նա որեւէ կերպ չէր կարող առնչություն ունենալ այդ միջադեպի հետ:

Հարցին, թե այդ դեպքում, այս պատմության ու միջադեպի համատեքստում ինչո՞ւ են հոլովվում, նախ իր եղբոր՝ Ֆառի, եւ ԱԺ պատգամավոր Սամվել Ալեքսանյանի մտերիմ ընկեր՝ Ռուբեն Սիմոնյանի՝ հայտնի «Բոգոյի» անունները, վերջինս արձագանքեց, թե. «Այ Ձեր ցավը տանեմ հարցնում եք, ես էլ ճիշտն ասում եմ, էլի չեք հավատում: Իմ եղբայրը հիմա իր առողջական խնդիրներով է զբաղված, ի՞նչ կապ ունի ինքը էդ միջադեպի հետ: Մենք որեւէ հարց, որեւէ խնդիր չունենք ազատամարտիկ Հեբո Խչեյանի որդու հետ: Ինչի մասին ա խոսքը: Էս պահին իմ եղբայրը արտերկրում բուժումներ է ստանում, նա ո՞նց կարող էր էդ ամենի հետ կապ ունենար: Իսկ թե ո՞ւմ ա պետք կամ ձեռնտու հոլովվել մեր ընկերոջ՝ Ռուբեն Սիմոնյանի անունը, դա էլ չեմ հասկանում: էդ մարդը զբաղված ա իր տնտեսական գործունեությամբ, աշխատատեղեր ա ստեղծում, ընտանիքներ են ապրում էդ աշխատանքով, ու ինչի չէ՞, շատ մարդկանց էլ՝ մենք էլ, պարոն Սիմոնյանն, էլ մեր հնարավարություն սահմաններում ձեռք ենք մեկնում: Ի վերջո, ինչի՞ են ուզում չեղած տեղից կրակի վրա բենզին լցնել ու ավելորդ լարվածություն առաջացնել: Կրկնում եմ, ո՛չ իմ եղբայրը, ո՛չ էլ մեր ընկեր Ռուբեն Սիմոնյանը այդ պատմության հետ որեւէ կերպ կապ ունենալ չեն կարող: Ուղղակի կարիք էլ չկա, որ ուզում եք անպաման տարբեր մարդկանց շրջապատում կրքեր բորոբոքել:Փոխանակ խաղաղություն ուզենաք հասատատեք մարդկանց մեջ՝ կռիվներ եք գցում: Բայց դե գոնե գրելուց էլ՝ ճիշտ բաներ ա պետք գրել: Խոսում են ազատամարտիկ Հեբո Խչեյանի անունից, էն դեպքում երբ ազատամարտիկ Հեբո Խչեյանը երկու տարի կա երեւի, որ մահացել է: Ախր չի կարելի չէ՞, տենց բաներ անել: Լավ բաներ արեք, քուրիկ ջան, ամոթ ա, բոլորս էլ մարդ ենք, ուզում ենք, որ մեկ-մեկ էլ լավ բաների մասին գրեք»:

Ի դեպ, Գեղարքունիքի մարզպետ Ռաֆիկ Գրիգորյանն էլ իր հերթին, Fnews.am-ի հետ զրույցում նշեց, որ իրեն հասած տեղեկությունների համաձայն, Երեւանում ինչ-որ վիճաբանություն է եղել վարորդների միջեւ, որն էլ հիմա անցել-գնացել է: Ամեն ինչ հարթվել է, մարզում էլ լարված մթնոլորտ չկա, որեւէ խնդիր չկա.«Հանգիստ եղեք,ամեն բան անցյալում է»,-մեզ հետ զրույցում հավաստիացրեց մարզպետը:

Հավելենք, որ ՀՀ ոստիկանությունն էլ իր հերթին, օրեր առաջ տեղեկացրել էր, որ որ նման միջադեպի առնչությամբ հաղորդում չի ստացվել: Այսինքն՝ ազատամարտիկի որդին իրեն ծեծելու դեպքով հաղորդում չի ներկայացրել ոստիկանություն: 

 Ն. Ադամյան