Եթե շատերդ կարողանաք գոնե մի քանի րոպե ՍՄԵՐՉՆԵՐԻ ու ԳՐԱԴՆԵՐԻ դեմ կռիվ տալ, նոր կմտածեք ինքնափիառվելու ու Ձեր «համեստ» անձը ռասկռուտկա անելու մասին

Վերջ տվեք այդ ԱՆԼՐՋՈՒԹՅԱՆԸ ...

Հայրենի օլիգարխիայի գիգանտ ներկայացուցիչներ ու պետական սեկտորում տեղակայված ֆիգուրներ. 

Այն, որ Ձեր սուրբ պարտականությունն է մշտապես կանգնել հայ զինվորի, արյան գնով հայրենիքի սահմանները պահող մեր հերոսների կողքին, դա նոր չէ, որ պիտի իմանայիք: Եւ հիմա չէ, որ պետք է գլխի ընկնեիք, որ 24 ժամ պետք է մտածել. սիրել ու փայփայել հայրենի հողն ու սահմանը: Չխոսեմ հայ ժողովրդի միահամուռ լինելու ու մի բռունցք դառնալու մասին, քանի որ այդ բռունցքի ԲԱՄՓ-Ը աշխարհն էլ ԶԳԱՑ…

Ասելիքս այն է, որ այս ԽԱՌՆԱԿ ժամանակներում կարիք չկա մեր հերոսների ֆոնի վրա հերոսանալ, եւ սահման ուղարկվող օգնության՝ սննդի ու հագուստի թվերը մեկ առ մեկ տիրաժավորել ու նշել, թե քանի հատ մակարոն ու քանի տուփ սիգարետ կամ «կանսերվա» ուղարկեցիք սահմանին կանգնող մեր ՀԵՐՈՍ տղաներին: Վե'րջ տվեք այդ անլրջությանը. Մի մոռացեք, որ հազար աչք է մեզ նայում ու հետեւում: Եթե որպես հաշվետվություն եք ուզում ներկայացնել Ձեր արածը, ապա լավագույն դեպքում ասեք, որ հագուստ ու սնունդ ուղարկեցիք սահման եւ վե'րջ: Այլ ոչ թե պիառվեք, թավալվեք՝ ջիփերով ու կամուֆլյաժներով «պտիչկա» դրեք, թե քանի տոպրակ շոր, կոշիկ ու ձեթ հասցրեցիք մեր տղաներին: Նրանց փոխարեն եթե շատերդ կարողանաք գոնե մի քանի րոպե պայթող արկերի որոտի տակ կանգնել, ՍՄԵՐՉՆԵՐԻ ու ԳՐԱԴՆԵՐԻ դեմ  կռիվ տալ, նոր կմտածեք ինքնափիառվելու ու Ձեր «համեստ» անձը ռասկռուտկա անելու մասին:

Եւ վերջապես մակարոնների ֆոնին լուսանկարվելով ու սելֆիներ անելով չեք սրբագործվելու, ինքնամաքրվելու, ու ազգի հերոսներ դառնալու...

Փա'ռք ու պատիվ մեր վետերաններին ու այն կամավորներին, ովքեր առաջին իսկ օրվանից պատրաստակամություն հայտնեցին մեկնել ճակատ, կանգնել մեր քաջարի երիտասարդների կողքին՝ կռիվ տալու թշնամու դեմ: Փառք մեր Հայոց Բանակին:
Փառք ու պատիվ արյան գնով հայրենիքի սահմանների պաշտպանության համար ընկած մեր քաջարի հերոսներին, ովքեր հանուն հայրենիքի տվեցին ամենաթանկը՝ իրենց կյանքը:
Երախտապարտ ենք Քեզ Հայ զինվոր:

Գայանե Զարգարյան